Ríkisstjórnin hyggst leggja til 15,9 prósenta hækkun kílómetragjalds á ökutæki samkvæmt fjárlagafrumvarpi fyrir árið 2027, sem Daði Már Kristófersson fjármálaráðherra kynnti í morgun.

Hækkunin skiptist annars vegar í 5,2 prósenta verðlagsuppfærslu og hins vegar tekjuauka upp á fjóra milljarða króna. Markmiðið er að tekjur ríkissjóðs af ökutækjum og eldsneyti nemi 1,7 prósentum af vergri landsframleiðslu. Þá er jafnframt lagt til að bifreiðagjald hækki um 5,2 prósent í samræmi við verðbólgu.

Tekjur af ökutækjum og eldsneyti eru áætlaðar um 89 milljarðar króna árið 2027.

Kílómetragjaldið var tekið upp í ársbyrjun og kom í stað bensín- og olíugjalda. Stjórnvöld segja breytinguna lið í að styrkja tekjustofna ríkisins vegna ökutækja og mæta áhrifum hraðra orkuskipta á tekjur ríkissjóðs til framtíðar.