Kona frá Kentucky í Bandaríkjunum, sem segist vera konan sem sést verða fyrir grófu líkamlegu ofbeldi á eftirlitsmyndbandi sem hefur vakið mikla athygli á netinu undanfarna daga, hefur fengið dómsúrskurð um nálgunarbann gegn manninum sem hún sakar um árásina. Þetta kemur fram í dómskjölum sem TMZ hefur undir höndum.
Samkvæmt gögnunum hefur Nathan Seale verið gert að halda sig í að minnsta kosti 150 metra fjarlægð frá Amber Marie Mitchell og er honum jafnframt bannað að hringja í hana, senda henni skilaboð eða hafa við hana samband með nokkrum öðrum hætti.
Myndbandið, sem sýnir meint samskipti parsins, sýnir karl og konu sitjandi við borð þegar maðurinn skyndilega grípur drykk og hendir honum framan í konuna í miðju samtali. Konan rís á fætur en maðurinn hrindir henni þá í gólfið og sparkar síðan í hana þegar hún reynir að standa upp. Því næst grípur hann tösku af borðinu, sem virðist tilheyra konunni, og þegar hún gengur í átt til hans tekur hann hana kverkataki og hendir henni aftur í gólfið áður en hann yfirgefur staðinn.
Í beiðni sinni um nálgunarbann lýsir Mitchell atburðarás sem er nánast samhljóða því sem sést á myndbandinu. Hún segir að samskipti þeirra hafi ekki verið góð áður en meint árás átti sér stað. Að hennar sögn hafði hún átt í stuttu sambandi við Seale, sem hafi sýnt af sér munnlegt ofbeldi í skilaboðum eftir sambandsslitin. Hún hafi samþykkt að hitta hann til að eiga það sem hún taldi að yrði „kurteislegt samtal“ um samband þeirra en þá hafi hann ráðist á hana með fyrrgreindum hætti.
Samkvæmt fréttaveitunni WLKY hefur Seale verið ákærður fyrir alvarlega líkamsárás.
