Yfirmaður á Wendy’s-veitingastað í Tennessee í Bandaríkjunum hefur verið rekinn eftir að hafa bundið starfsmann við eldhúsbúnað með ruslapokum. Atvikið náðist á myndband og hefur vakið töluverða athygli.

Samkvæmt lögregluskýrslu viðurkenndi yfirmaðurinn, Michiko Burton, að hafa bundið starfsmanninn. Annar starfsmaður, Nicholus Murphy, tók atvikið upp á myndband.

Murphy sagði í samtali við WSMV að Burton hefði sagt samstarfsfólki að hún þyrfti á því að halda að starfsmaðurinn „héldi kyrru fyrir“ svo hún gæti sinnt störfum sínum annars staðar á veitingastaðnum. Murphy sagðist hafa orðið mjög brugðið við að sjá meðferðina á samstarfsmanni sínum.

Burton sagði lögreglu að um brandara hefði verið að ræða sem tengdist vinsælu TikTok-trendi. Starfsmaðurinn sem var bundinn sagði lögreglu að hann hefði hvorki meiðst né orðið ósáttur vegna atviksins. Engin ákæra var því gefin út.

Málið hafði engu að síður afleiðingar fyrir Burton. Svæðisstjóri Wendy’s lýsti háttseminni sem „óásættanlegri“ á fundi með starfsfólki og framkvæmdastjóri veitingastaðarins staðfesti síðar að Burton hefði verið sagt upp störfum.

Í yfirlýsingu frá Wendy’s of Bowling Green segir að öryggi og velferð starfsfólks sé í forgangi og að hegðun af þessu tagi samræmist hvorki gildum fyrirtækisins né þeim kröfum sem gerðar séu á veitingastöðum þess.

Fjölskylda starfsmannsins hefur nú farið fram á að lögregla taki málið aftur til rannsóknar.