Yfirvöld í Denver í Bandaríkjunum hafa staðfest að 41 árs gamall maður, Michael Mott, hafi látist eftir að hafa orðið fyrir hreyfli farþegaþotu á Denver International Airport síðastliðið föstudagskvöld. Samkvæmt niðurstöðu réttarmeinafræðings var um sjálfsvíg að ræða.
Sterling McLaren, réttarmeinafræðingur í Denver-sýslu, sagði að dánarorsök mannsins hefði verið fjöláverkar eftir árekstur við flugvélina. Engin kveðjubréf eða skilaboð fundust á vettvangi og rannsaka yfirvöld nú hvað hafi leitt til atviksins.
Atvikið átti sér stað þegar Frontier Airlines-vél var í flugtaki. Samkvæmt upplýsingum frá rannsóknaraðilum hafði maðurinn komist inn á afmarkað öryggissvæði flugvallarins eftir að hafa klifrað yfir um 2,5 metra háa girðingu. Flugumferðarstjórar staðfestu skömmu síðar að líkamsleifar hefðu fundist á flugbrautinni og farþegar vélarinnar voru í kjölfarið fluttir frá borði.
Fimm einstaklingar voru fluttir á sjúkrahús eftir atvikið, en samkvæmt bandarískum fjölmiðlum hafa fjórir þeirra verið útskrifaðir.
Yfirvöld greindu einnig frá því að hreyfiskynjarar við flugvöllinn hefðu á sama tíma numið hreyfingu hjartarhjarðar á svæðinu þar sem maðurinn komst inn á flugbrautina. Atvikið átti sér stað um tveimur mílum frá flugstöð flugvallarins.
Rannsókn málsins stendur enn yfir.
Í þessari grein er fjallað um sjálfsvíg
Fólki með sjálfsvígshugsanir er bent á upplýsingasíma heilsugæslunnar s.1700, netspjallið heilsuvera.is, Hjálparsíma Rauða krossins s.1717, á netspjallið 1717.is og á Píeta símann s.552-2218. Þau sem misst hafa ástvin í sjálfsvígi er bent á stuðning í Sorgarmiðstöð s. 551-4141, upplýsingasíma heilsugæslunnar s.1700, netspjallið heilsuvera.is og á Píeta símann s.552-2218.
