Fjölmiðlamaðurinn knái Logi Bergmann Eiðsson snýr aftur á RÚV en greint er frá þessu í Facebook-færslu hjá Rás 2.

Því miður fyrir aðdáendur Loga virðist aðeins um tímabundið verkefni að ræða en hann mun stýra, ásamt Birtu Björnsdóttur, þættinum Partíverkin. Þátturinn verður sendur út í kvöld klukkan 22:03 og lýkur honum á miðnætti. Samkvæmt síðu RÚV kom Logi einnig að síðasta þætti.

Logi var eitt sinn einn þekktasti starfsmaður RÚV en hann byrjaði sem íþróttafréttamaður á RÚV árið 1991. Hann var síðar gerður að varafréttastjóra en færði sig yfir til Stöðvar 2 árið 2005. Þá var hann einnig spyrill í Gettu Betur í sjónvarpinu og útvarpinu frá 1999 til 2005.

Logi býr núna í Washington D.C. en Svanhildur Hólm Valsdóttir, eiginkona Loga, er sendiherra Íslands í Bandaríkjunum.