Vinsældir Íslands sem áfangastaðar fyrir ferðamenn leiða af sér breytta ásýnd og upplifun af náttúruperlum landsins.
Frá og með þessu sumri verður í fyrsta sinn sólarhringsgjaldtaka af bílastæðum í Landmannalaugum að Fjallabaki. Á næstunni verður komið upp myndavélakerfi Parka í Landmannalaugum.
Samhliða breytingunni verður bílastæðagjald hækkað, en aðgangur fæst að salerni á móti.
Ferðaþjónustuaðilar þurfa ekki að bóka bílastæði fyrirfram, ólíkt almenningi.
Bóka þarf bílastæði
Í fyrra þurfti fólk í fyrsta sinn að greiða bílastæðagjöld þegar það kom í náttúruperluna Landmannalaugar. Ástæðan var umferðarhnútar sem mynduðust á svæðinu. Að meðaltali komu 300 bílar á sólarhring í Landmannalaugar, sem var umfram afkastagetu bílastæða á svæðinu. Þannig þurfti fólk í fyrsta sinn að bóka bílastæði fyrirfram, ef það ætlaði að koma á svæðið á bilinu 9 til 16 yfir daginn.
Verðskrá bílastæða í Landmannalaugum
Fólksbifreið - Allt að 5 sæta
1.200 kr.
Fólksbifreið - Frá 6 til 9 sæta
2.000 kr.
Rúta - Frá 10 til 19 sæta
4.500 kr.
Rúta - Frá 20 til 32 sæta
8.000 kr.
Rúta - Frá 33 til 64 sæta
14.000 kr.
Bifhjól
600 kr.
Sú breyting verður gerð frá og með þessu sumri, af hálfu Náttúruverndarstofnunar, að rukkað verður á svæðið allan sólarhringin, frekar en eingöngu yfir hádaginn.
„Nú er um sólarhringsgjaldtöku að ræða yfir allt sumarið,“ segir Daníel Freyr Jónsson, svæðissérfræðingur Náttúruverndarstofnunar. Án bókunar gæti fólk þurft að hverfa frá tilraunum til að heimsækja Landmannalaugar. „Til að eiga tryggan aðgang að bílastæði yfir háönn dagsins, milli klukkan 9 og 16, þurfa gestir ennfremur að bóka bílastæði fyrirfram,“ segir hann.
Ferðaþjónusta bókar ekki
Ferðaþjónustan forgang á aðgang umfram almenning, eins og í fyrra. „Ferðaþjónustubílar eru undanskildir kröfu um bókun en greiða sama gjald og aðrir,“ segir Daníel Freyr.
Í fyrra kostaði 450 krónur fyrir fólk á bifreið með 1-5 sæti. Nú hefur gjaldið verið hækkað í 1.200 krónur. Því fylgir þó, ólíkt áður, aðstöðugjald hjá Ferðafélagi Íslands, sem hefur haldið úti salerni og annarri aðstöðu frá árinu 1951 í Landmannalaugum. „Þetta þýðir að aðgangur að salerni er tryggður fyrir alla gesti án þess að rukkað sé sérstaklega fyrir,“ segir Daníel Freyr.
Það veltur þó á því að fólk nái að bóka bílastæðin í tæka tíð. Opnað var fyrir bókanir 1. apríl.
