Lögreglan á höfuðborgarsvæðinu hafði í nógu að snúast á síðasta sólarhring en nokkrir voru handteknir vegna fíkniefna- og ölvunaraksturs auk annarra brota.

Tveir aðilar voru handteknir í Reykjavík grunaðir um þjófnað, brot á lögreglusamþykkt, vörslu fíkniefna og fyrir að hlýða ekki fyrirmælum lögreglu.

Þrír ökumenn voru handteknir í Reykjavík vegna gruns um ölvunar- og/eða fíkniefnaakstur. Einn þeirra reyndist jafnframt hafa fíkniefni í vörslum sínum.

Í Hafnarfirði varð umferðaróhapp sem leiddi til minniháttar eignatjóns. Engin slys urðu á fólki. Annað umferðaróhapp var tilkynnt í Hafnarfirði þar sem ökumaður var kærður fyrir að yfirgefa vettvang slyss. Ein bifreið var dregin af vettvangi en ekki urðu slys á fólki.

Þá var ökumaður í Hafnarfirði handtekinn vegna gruns um fíkniefnaakstur.

Í Kópavogi var ökumaður kærður fyrir að virða ekki gangbrautarrétt eftir að hafa ekið á hjólandi vegfaranda. Ekki liggja fyrir upplýsingar um meiðsli hins hjólandi.

Lögregla hafði einnig afskipti af einstaklingi í Breiðholti sem kærður var fyrir brot á lögum um velferð dýra eftir að hafa misþyrmt gæludýri sínu.

Síðar var annar ökumaður handtekinn í sama hverfi grunaður um fíkniefnaakstur, akstur sviptur ökurétti og skjalafals.