Rabbíni gyðinga á Íslandi segir nýja gyðingamenningarmiðstöð við Hverfisgötu í Reykjavík hafa verið fjármögnuð með einkaframlögum frá einstaklingum á Íslandi og erlendis, en neitar að upplýsa hverjir styrktu verkefnið eða hversu há framlög þeirra voru.
Fram kemur í ítarlegri umfjöllun Heimildarinnar að áætlaður kostnaður við kaup og endurbætur á húsnæðinu sé um 3,6 milljónir Bandaríkjadala, eða um 455 milljónir króna. Á söfnunarsíðu verkefnisins kemur fram að um 96 prósent þeirrar upphæðar hafi safnast.
Athygli vekur að rússneski auðmaðurinn Eugene Shvidler klippti á borðann við opnun miðstöðvarinnar fyrr í mánuðinum. Húsið ber jafnframt nafn hans, Beit Shvidler Jewish Center of Iceland.
Shvidler er á viðskiptaþvingunarlista breskra stjórnvalda vegna tengsla sinna við rússneska auðkýfinginn Roman Abramovich. Þá hefur hann einnig verið nefndur sem styrktaraðili Elad-sjóðsins, sem styður uppkaup á eignum Palestínumanna í Austur-Jerúsalem og stækkun ólöglegra ísraelskra landnemabyggða.
Rabbíninn Avraham Feldman segir þó að menningarmiðstöðin sé ekki fulltrúi Ísraels heldur hafi það markmið að þjóna gyðingasamfélaginu á Íslandi og kynna gyðinglega menningu og sögu.
„Sem aðalrabbíni á Íslandi er hlutverk mitt að þjóna samfélaginu á staðnum. Ég er ekki fulltrúi Ísraels né tala fyrir neina ríkisstjórn,“ segir Feldman í skriflegu svari til Heimildarinnar.
Hann segir jafnframt að Chabad-hreyfingin, sem rekur miðstöðina, leggi áherslu á menningar- og samfélagsstarf og að í húsinu verði brátt opnað safn um sögu gyðinga á Íslandi.
Sjá má umfjöllun Heimildarinnar hér.
