Bresk yfirvöld eru ugga yfir óvæntri getu Írana til að skjóta á loft langdrægum eldflaugum.
Eins og fram hefur komið í fréttum skaut Íran tveimur langdrægum eldflaugum á sameiginlega herstöð Bretlands og Bandaríkjanna á Diego Garcia-eyjum í Indlandshafi, samkvæmt nýjum upplýsingum. Engin eldflauganna hæfði markið; önnur bilaði í flugi og hin var skotin niður af bandaríska hernum.
Atvikið hefur vakið verulegar áhyggjur meðal breskra yfirvalda, þar sem talið er að Íran búi yfir meiri hernaðargetu en áður var talið. Eldflaugarnar voru sagðar geta náð allt að 4.000 kílómetra drægni, sem þýðir að stórborgir eins og París og jafnvel Lundúnir gætu verið innan skotfæris að því er segir í frétt Mirror.
Utanríkisráðherra Bretlands, Yvette Cooper, sagði árásina vera hluta af „óábyrgum árásum“ Írans gegn bandamönnum og alþjóðlegum hagsmunum. Hún lagði áherslu á að Bretar styðji varnaraðgerðir til að verja eigin hagsmuni og kallaði eftir skjótum lausnum á átökunum.
Varnarmálaráðherra Ísraels, Israel Katz, sagði að árásir myndu harðna á næstu dögum. Samkvæmt ísraelska hernum var þetta í fyrsta sinn sem Íran beitir svo langdrægum eldflaugum í átökunum.
Sérfræðingar telja að árásin sýni að eldflaugageta Írans hafi verið vanmetin. Fyrr var talið að drægni þeirra væri um 2.000 kílómetrar, en árásin á Diego Garcia bendir til mun meiri getu.
Fyrrverandi hershöfðingi, Sir Richard Barrons, sagði að „óvinurinn hafi verið vanmetinn“ og að þróun átakanna ógni nú hagsmunum Bretlands og bandamanna. Greinendur telja að ef þessi geta staðfestist hafi ógnin víkkað verulega og nái nú langt út fyrir Mið-Austurlönd.
Á sama tíma hefur spenna aukist í átökunum. Ísraelsher segist hafa gert umfangsmiklar loftárásir á Teheran og fleiri skotmörk í Íran, á meðan Íran hefur svarað með árásum á herstöðvar og skotmörk á svæðinu.
Í Bretlandi hefur stjórnarandstaðan gagnrýnt viðbrögð stjórnvalda og sakað forsætisráðherrann Keir Starmer um að hafa haldið upplýsingum leyndum um árásina. Þá hefur einnig verið varað við því að Bretland sé smám saman að dragast inn í átökin.
Bresk stjórnvöld hafa þó ítrekað að þau taki ekki þátt í árásaraðgerðum, heldur einungis varnaraðgerðum. Talsmaður varnarmálaráðuneytisins sagði að árásir Írans ógni bæði breskum hagsmunum og bandamönnum, og að breskar hersveitir vinni að því að verja svæðið.
Á sama tíma hafa Sameinuðu þjóðirnar hvatt til hernaðarlegs aðhalds til að koma í veg fyrir frekari stigmögnun og möguleg kjarnorkuslys.
