Klámfyrirtækið Aylo, sem á meðal annars vefsíðurnar Pornhub, YouPorn og Redtube, tilkynnti í gær að það hefði opnað að nýju takmarkaðan aðgang fyrir notendur í Bretlandi eftir að hafa lokað þjónustunni þar í febrúar vegna ágreinings um aldursstaðfestingu og vernd barna.
Í yfirlýsingu frá fyrirtækinu segir að verið sé að „stíga varfærnislegt skref“ til að endurheimta aðgang að Pornhub fyrir fullorðna notendur í Bretlandi sem hafi staðist aldursstaðfestingu. Að svo stöddu nær breytingin eingöngu til notenda á iPhone- og iPad-tækjum frá Apple sem hafa uppfært í nýjasta stýrikerfið.
Aylo segir að með nýja kerfinu hafi Apple innleitt „fyrstu aldursstaðfestingarlausn heims sem byggir á sjálfu tækinu“ fyrir notendur í Bretlandi. Fyrirtækið telur þetta mikilvægt fyrsta skref í átt að alþjóðlegri lausn sem geti aukið vernd barna á netinu.
Samkvæmt Aylo virkja nýju hugbúnaðaruppfærslurnar sjálfkrafa ákveðnar öryggisstillingar fyrir börn, unglinga og þá notendur sem ekki hafa staðfest aldur sinn.
Breska löggjöfin um netöryggi, Online Safety Act, tók gildi í júlí á síðasta ári og kveður á um að klámsíður framkvæmi strangar aldursathuganir, meðal annars með andlitsgreiningu eða staðfestingu með greiðslukorti. Brot gegn reglunum geta varðað háum sektum.
Aylo hefur gagnrýnt lögin harðlega og sagði fyrr á árinu að reglurnar hefðu „beint umferð yfir á dekkri og óeftirlitsskyldari svæði internetsins“ án þess að ná markmiði sínu um að vernda börn.
Fyrirtækið hefur einnig lokað þjónustu sinni í Frakklandi og í nokkrum ríkjum Bandaríkjanna vegna sambærilegra reglna um aldursstaðfestingu.
Í mars sakaði Evrópusambandið Pornhub og þrjú önnur klámefnisfyrirtæki um að hafa ekki komið í veg fyrir að börn fengju aðgang að efni fyrir fullorðna, sem gæti leitt til hárrar sektar samkvæmt stafrænum reglum sambandsins.
Breska fjölmiðlaeftirlitið Ofcom brást við tilkynningu Aylo og sagði að stofnunin myndi „fylgjast náið með þessum breytingum“. Þá ítrekaði eftirlitið að samkvæmt Online Safety Act bæru vefsíður og öpp sjálf ábyrgð á því að koma í veg fyrir að börn fengju aðgang að klámefni.
