Menningar- og íþróttasvið Reykjavíkurborgar hefur náð þeim áfanga að allir starfsstaðir sviðsins hafa hlotið Regnbogavottun borgarinnar en greint er frá þessu í tilkynningu frá borginni.

Með því hafa allar sundlaugar Reykjavíkur, söfn Borgarbókasafnsins, Listasafns Reykjavíkur og Borgarsögusafns, auk annarra starfsstöðva sviðsins, fengið vottunina.

Regnbogavottunin er hluti af stefnu Reykjavíkurborgar um að efla þekkingu og meðvitund um málefni hinsegin fólks og tryggja að þjónusta og vinnuumhverfi séu inngildandi, örugg og laus við fordóma. Verkefnið hófst árið 2020 og hafa um 150 vinnustaðir innan borgarkerfisins hlotið vottunina frá þeim tíma.

Menningar- og íþróttasvið var meðal fyrstu sviða borgarinnar til að taka þátt í verkefninu. Sex starfsstaðir sviðsins voru jafnframt þeir fyrstu hjá Reykjavíkurborg til að hljóta vottunina, þar á meðal Vesturbæjarlaug, Ylströndin, Fjölskyldu- og húsdýragarðurinn, skrifstofa sviðsins, Breiðholtslaug og Borgarbókasafnið í Gerðubergi.

Markmið vottunarinnar er að bæta þjónustu við íbúa og stuðla að jákvæðu og öruggu starfsumhverfi fyrir starfsfólk. Menningar- og íþróttasvið lítur á þann árangur sem mikilvægan áfanga í áframhaldandi vinnu við jafnrétti, fjölbreytileika og inngildingu í þjónustu borgarinnar.