Tugir þekktra rithöfunda, fræðimanna og aðgerðasinna víðs vegar að úr heiminum hafa skrifað undir yfirlýsingu þar sem þeir lýsa yfir samstöðu með föngum úr samtökunum Palestine Action sem sitja í hungurverkfalli í Bretlandi.
Meðal undirritaðra eru rithöfundurinn Naomi Klein, skáldsagnahöfundurinn Sally Rooney, aðgerðarsinninn og fræðimaðurinn Angela Davis, heimspekingurinn Judith Butler og blaðamaðurinn George Monbiot. Þau lýsa stuðningi við þrjá breska aðgerðarsinna sem neita að neyta fæðu þar til kröfum þeirra verður mætt.
Heba Muraisi og Kamran Ahmed hafa verið í hungurverkfalli í 71 og 64 daga, en mótmælin hófust í nóvember. Þriðji fanginn, Lewie Chiaramello, sveltur sig annan hvern dag vegna sykursýki af tegund 1. Þá hefur Umer Khalid hafið nýtt hungurverkfall eftir að hafa áður stöðvað slíkt af heilsufarsástæðum. Fjórir af átta aðgerðarsinnum sem tóku þátt í upphaflegu mótmælunum hafa hætt verkfallinu vegna versnandi heilsu.
Aðgerðarsinnarnir eru vistaðir í mismunandi fangelsum vegna meintrar aðildar þeirra að innbrotum í breskt dótturfélag ísraelska varnarfyrirtækisins Elbit Systems í Bristol og á flugstöð breska flughersins (RAF) í Oxfordshire. Þau hafna öllum ákærum, sem meðal annars snúa að innbroti og ofbeldisfullum óeirðum.
Fangarnir krefjast þess að fá lausn gegn tryggingu og réttláta málsmeðferð, auk þess sem þeir krefjast þess að bresk stjórnvöld dragi til baka ákvörðun sína um að skilgreina Palestine Action sem „hryðjuverkasamtök“.
Þá kalla þeir einnig eftir lokun allra starfsstöðva Elbit Systems í Bretlandi og að því sem þeir lýsa sem ritskoðun innan fangelsanna verði hætt, þar á meðal haldlagningu pósts, símtala og bóka.
Allir átta aðgerðarsinnarnir munu hafa setið í gæsluvarðhaldi í meira en ár án þess að mál þeirra hafi komið fyrir dóm, sem fer langt fram úr hefðbundnu sex mánaða hámarki Bretlands fyrir gæsluvarðhald án réttarhalda.
Alþjóðlegur þrýstingur á bresk stjórnvöld fer vaxandi um að gripið verði til aðgerða til að vernda líf fanganna. Fyrrverandi hungurverkfallsfangar frá Írlandi, Palestínu og Guantanamo-flóa hafa sent frá sér neyðarákall þar sem þeir krefjast þess að breskir ráðherrar fundi með fjölskyldum fanganna og lögmönnum þeirra.
Vinir og ættingjar fanganna hafa sagt Al Jazeera að þau hyggist halda hungurverkfallinu áfram þar til öllum kröfum verði mætt, þrátt fyrir að heilsu þeirra hraki hratt.
Á gamlárskvöld komu hundruð saman í Belfast til að sýna hungurverkfallsföngunum samstöðu. Ómuðu slagorð þeirra framhjá veggmyndum sem ekki aðeins prýða borgina heldur bera einnig vitni um átakasögu hennar.
Meðfram Falls Road standa írskar lýðveldissinnaðar veggmyndir hlið við hlið við palestínskar. Alþjóðlegi veggurinn, sem eitt sinn var síbreytilegur strigi alþjóðlegra baráttumála, hefur nú fengið viðurnefnið „palestínski veggurinn“. Þar má sjá ljóð hins látna palestínska rithöfundar Refaat Alareer, sem féll í ísraelskri loftárás í desember 2023, teygja sig eftir endilangri veggnum. Myndefni sem palestínskir listamenn hafa sent hefur verið málað af heimamönnum.
Nýlega hafa einnig birst ný orð á frægustu veggjum Belfast: „Sælir eru þeir sem hungrar eftir réttlæti.“
