Leo Schilperoord, hollenskur fuglafræðingur, er talinn vera svokallaður „sjúklingur núll“ í banvænu hantaveiru-farsóttinni um borð í skemmtiferðaskipinu MV Hondius, sem sagt sá sem fyrst smitaðist.
Leo, sem var sjötugur, fór um borð í skipið ásamt eiginkonu sinni, Mirjam Schilperoord, eftir ferð þeirra um Suður-Ameríku. Talið er að þau hafi smitast eftir heimsókn á urðunarstað skammt frá borginni Ushuaia í Argentínu þann 27. mars.
Svæðið, sem er rétt fyrir utan borgina Ushuaia, sem kölluð er „endi heimsins“, er vinsælt meðal fuglaskoðara vegna sjaldgæfra fuglategunda sem halda þar til. Argentínsk yfirvöld telja hjónin hafa smitast af Andes-afbrigði hantaveiru eftir snertingu við sýkt nagdýr á ruslahaugnum.
Fjórum dögum síðar, 1. apríl, lögðu þau af stað með MV Hondius frá Ushuaia ásamt 112 öðrum farþegum. Þann 6. apríl fór Leo að finna fyrir hita, höfuðverk, magaverkjum og niðurgangi. Hann lést um borð fimm dögum síðar.
Lík hans var áfram í skipinu þar til það lagðist að bryggju á Saint Helena þann 24. apríl.
Mirjam ferðaðist með lík eiginmanns síns til Suður-Afríku, en veiktist einnig skömmu síðar. Hún var komin um borð í flugvél frá Jóhannesarborg til Amsterdam þegar henni var neitað um ferðaleyfi vegna heilsufars hennar. Hún var flutt á sjúkrahús þar sem hún lést daginn eftir, 26. apríl.
Þriðji farþeginn sem er látinn er þýskur ríkisborgari.
Hjónin voru frá þorpinu Haulerwijk í Hollandi og voru minnst í minningargreinum í staðarblaði heimabæjarins. Þar stóð meðal annars: „Eins og fuglar á flugi. Við munum sakna ykkar og sagnanna ykkar.“
Alþjóðaheilbrigðismálastofnunin greindi frá því í dag að staðfest hantaveirusmit tengd skipinu væru nú orðin sex talsins.
