Rússar hafa sýnt frá því sem þeir kalla stærstu drónaverksmiðju heimsins og dreifði upptökum innan úr verksmiðju sem setur saman banvæna árásardróna sem eru notaðir í daglegum árásum á Úkraínu.
Moskva hefur á síðustu vikum aukið loftárásir og skotið metfjölda dróna á úkraínskar borgir þrátt fyrir ítrekuð áköll frá Donald Trump, Bandaríkjaforseta, um að hætta árásunum.
Myndbandið, sem var birt á sunnudag af Zvezda, sjónvarpsstöð í eigu rússneska varnarmálaráðuneytisins, sýndi ópersónugreinanlegt starfsfólk setja saman kolsvarta, þríhyrnda árásardróna.
„Þetta er stærsta verksmiðja heims sem framleiðir ómannaðar bardagaflugvélar — og jafnframt sú leynilegasta,“ sagði Timur Shagivaleev, forstöðumaður verksmiðjunnar, sem hefur verið settur á viðskiptabannlista Bandaríkjanna.
Verksmiðjan er staðsett nálægt bænum Yelabuga í miðhluta Rússlands, í Tatarstan-héraði. Svæðið var upphaflega hugsað sem sérstakt efnahagssvæði til að styðja við vísindi og atvinnulíf í héraðinu.
Nú, rúmlega 1.000 kílómetra frá landamærum Úkraínu, hefur það orðið skotmark fyrir langdrægar árásir frá Kænugarði.
Til að styðja við vaxandi loftárásir Rússa er verksmiðjan — þar sem jafnvel unglingar í starfsnámi vinna — að framleiða nífalt fleiri dróna en upphaflega var gert ráð fyrir, að sögn Shagivaleev.
„Hundruð véla, þúsundir starfsmanna og alls staðar ungt fólk. Strákar og stelpur bæði vinna og læra í framhaldsnámi hér,“ sagði talsmaður í 40 mínútna löngu kynningarmyndbandi.
Geran-drónar Rússa byggja á írönsku Shahed-drónunum, sem Teheran hefur einnig útvegað Moskvu til að styðja við árásirnar.
Fyrir ofan inngang verksmiðjunnar má sjá risaskjá með áletruninni: „Kúrtjatov, Kórolyov og Stalín lifa í DNA-inu þínu,“ með myndum af Jósef Stalín, sovéska kjarnorkuvísindamanninum Igor Kúrtjatov og faðir sovéska geimáætlunarinnar, Sergei Kórolyov.
