Fjölmiðlamaðurinn Egill Helgason segir frá undarlegum draumi í Facebook-færslu sem vakið hefur kátínu í morgunsárið.
Í drauminum sat Egill til borðs með manni sem hann taldi vera rússneska skákmeistarann Viktor Kortsnoj. Það var ekki fyrr en síðar í draumnum sem Egill áttaði sig á því að maðurinn var svikahrappur sem þóttist vera hinn kunni skákmeistari.
„Áfram held ég að dreyma um menn sem eru ekki þeir sem þeir þykjast vera,“ skrifar Egill í færslunni.
Í draumnum sat Egill í veislu við Laugaveg ásamt manni sem hann taldi vera Kortsnoj. Skákáhugamaðurinn Páll Magnússon sat einnig við borðið. Egill segir að vel hafi farið á með sér og hinum meinta skákmeistara og að hann hafi rifjað upp ýmis afrek hans á skáksviðinu.
Hann hafi þó ekki treyst sér til að ræða einvígi Kortsnojs við Jóhann Hjartarson, sem Kortsnoj tapaði.
Reyndi að selja honum dýran jakka
Eftir veisluna fór Egill út með manninum, sem ætlaði að fá sér sígarettu. Kortsnoj var þekktur fyrir miklar reykingar. Þá tók maðurinn hins vegar upp á því að reyna að selja Agli skinnjakka sem hann sagði kominn alla leið frá Jakútíu.
Jakkinn átti að vera ómetanlegur og ætlaður konu fremur en karli. Egill sagðist telja að eiginkona sín gæti haft áhuga á flíkinni, en fór að efast þegar verðið kom í ljós.
„150 evrur, ég spurði aftur – já það var prísinn,“ skrifar Egill.
Verðið þótti honum óvenju lágt og þegar hann skoðaði jakkann nánar komst hann að því að hann var úr ódýru gerviefni og illa saumaður.
Þegar þeir gengu aftur inn á veitingastaðinn rann upp fyrir Agli að maðurinn væri alls ekki Viktor Kortsnoj heldur yngri maður sem þóttist vera hann. Kortsnoj væri enda látinn.
Ráðið í drauminn
Draumurinn tók síðan enn óvæntari stefnu. Egill lýsir því hvernig húsið, sem minnti hann á hús Máls og menningar, tók að beyglast saman. Hann komst hvorki fram né aftur.
„En það er önnur saga,“ segir Egill að lokum.
Fjölmargir hafa líkað við færslu Egils og hlegið með honum að drauminum en fréttaþulurinn og fjölmiðlakonan María Sigrún Hilmarsdóttir réði drauminn í eftirfarandi athugasemd:
„Jakkinn er ESB. Kortsnoj þjóðaratkvæðagreiðslan. Hús Máls&Menningar er Ísland“.
