Öldungadeildarþingmaðurinn Bernie Sanders gagnrýnir bæði Donald Trump og Benjamin Netanyahu harðlega í nýrri færslu sem hann birti á samfélagsmiðlum.

Í færslunni segir Sanders að bandarískar leyniþjónustustofnanir telji að Íran búi enn yfir um 70 prósentum af eldflaugabirgðum sínum og haldi megnið af skotgetu sinni, þrátt fyrir fullyrðingar Donalds Trump um að hernaðarmáttur landsins hafi verið „gjöreyðilagður“.

„Ótrúlegt en satt: Mánuði eftir að Trump hélt því fram að her Írans hefði verið „gjöreyðilagður“ segja bandarískar leyniþjónustur nú að Íran búi enn yfir 70% af eldflaugabirgðum sínum og mestu af skotgetu sinni,“ skrifaði Sanders.

Þá beinir Sanders spjótum sínum að forsætisráðherra Ísraels, Benjamin Netanyahu, og segir að Bandaríkin ættu ekki að láta hann móta utanríkisstefnu sína.

„Kannski ættum við ekki að leyfa Netanyahu, sem er lygari og stríðsglæpamaður, að stýra utanríkisstefnu Bandaríkjanna,“ skrifaði Sanders jafnframt.