Savannah Guthrie yfirgaf morgunþáttinn Today óvænt um 90 mínútum eftir að útsending hófst í gær, 6. maí. Meðstjórnandi hennar, Craig Melvin, sagði áhorfendum að hún hefði þurft að fara fyrr en myndi snúa aftur daginn eftir.

Óljóst er hvers vegna hún hætti í miðri útsendingu.

Guthrie, 54 ára, sneri nýlega aftur til starfa í apríl eftir tveggja mánaða hlé, sem hún tók til að vera með fjölskyldu sinni á meðan rannsókn stóð yfir á hvarfi móður hennar, Nancy Guthrie en rannsóknin er enn í gangi.

Tilkynnt var um hvarf Nancy, 84 ára, frá heimili sínu í Arizona þann 1. febrúar. Lögreglan telur að henni hafi verið rænt af heimilinu og hefur náð upptökum úr öryggismyndavél sem sýna grímuklæddan einstakling nálgast hús Nancy áður en hún hvarf og slá í myndavélina með hnefanum.

Savannah og systkini hennar hafa ítrekað óskað opinberlega eftir upplýsingum um hvar móðir þeirra sé „Einhver þarf að gera það sem er rétt,“ sagði Savannah við fyrrverandi meðstjórnanda sinn, Hoda Kotb, í viðtali í mars. „Við erum í sárum. Þetta er óbærilegt.“

Hún lýsti einnig mikilli vanlíðan vegna málsins: „Ég vakna á hverri nóttu og í myrkrinu ímynda ég mér ótta hennar.“

Þrátt fyrir allt segist hún halda í vonina um að móðir hennar finnist á lífi.

Lögregla hefur útilokað að Savannah og systkini hennar tengist málinu, en hún hefur gagnrýnt orðróm um slíkt harðlega og segir fjölskylduna standa saman í sorg og von.