Fallegt og rúmgott átta herbergja einbýlishús við Ljárskóga 2 í Seljahverfi í Reykjavík hefur verið sett á sölu. Ásett verð eignarinnar er 171,9 milljónir króna.

Húsið var reist árið 1975 og er samtals 306,8 fermetrar. Það skiptist í tvær jafnstórar hæðir, 153,4 fermetra hvor, en á neðri hæðinni er sjálfstæð þriggja herbergja aukaíbúð með sérinngangi. Lokað hefur verið á milli hæða en mögulegt er að opna aftur á milli þeirra.

Á efri hæð eru meðal annars eldhús, borðstofa, stofa, sjónvarpsstofa og fjögur herbergi. Stórir gluggar einkenna húsið og tvennar rúmgóðar svalir liggja í þrjár áttir.

Við húsið er um 90 fermetra verönd með heitum potti. Lóðin er 1.033 fermetrar að stærð og innbyggður bílskúr er í húsinu.

Eignin hentar því vel stórri fjölskyldu eða þeim sem vilja hafa möguleika á útleigu eða aðskildu íbúðarrými.