Íslenska gámafélagið ofrukkaði Garðabæ og Mosfellsbæ um samtals tugi milljóna króna vegna sorphirðu á nokkurra ára tímabili. Heimildin greinir frá þessu og vísar til gagna sem miðillinn hefur undir höndum.

Samkvæmt úttekt Resource International nam ofrukkun Garðabæjar 74 milljónum króna á núvirði á árunum 2017 til 2020 og Mosfellsbæjar 43 milljónum á árunum 2017 til 2021.

Sveitarfélögin kröfðust endurgreiðslu þegar ofgreiðslurnar komu í ljós. Samkvæmt gögnum málsins greiddi Íslenska gámafélagið þó enga vexti af fjárhæðunum.

Jón Þórir Frantzson, framkvæmdastjóri fyrirtækisins, harmaði málið í tölvupósti og sagði um „gríðarlegt tjón“ að ræða. Lagði hann til að skuldin yrði endurgreidd með skuldabréfi eða með því að fyrirtækið ynni upp í hana.

Kópavogsbær, sem einnig skipti við fyrirtækið um árabil, segir ekkert benda til þess að bærinn hafi ofgreitt fyrir sorphirðu.