Jay Slater, 19 ára, sendi síðustu skilaboð til vinar síns áður en hann lést á hörmulegan hátt en vinurinn fékk ekki skilaboðin fyrr en eftir andlátið. Jay hvarf í sumarfríi á Tenerife í fyrra eftir að hafa farið á tónlistarhátíð með vinum sínum.

Leit að honum hófst 17. júní 2024 þegar tilkynnt var um hvarf hans. Þrátt fyrir mikla leit fannst lík hans ekki fyrr en 15. júlí í afskekktu svæði nálægt þorpinu Masca.

Í ljós kom að Jay hafði horfið eftir að hafa farið í bílferð um 35 kílómetra leið inn í fjalllendið með tveimur mönnum sem hann kynntist á ferðinni. Hann féll um 24 metra niður í hættulegt gil þegar hann reyndi að ganga aftur til gististaðar síns í Los Cristianos.

Strax eftir hvarfið kviknuðu ýmsar samsæriskenningar á netinu og varð málið fljótt að alþjóðlegu umræðuefni. Yfir 30 milljónir mynda og myndbanda birtust á samfélagsmiðlum þar sem getgátur voru settar fram um afdrif hans.

Eins og Mannlíf sagði frá um helgina er ný heimildarmynd væntanleg sem fjallar um leit fjölskyldu hans að svörum. Fjölskyldan tjáir sig þar opinberlega í fyrsta sinn um málið. Í myndinni segir móðir hans, Debbie Duncan, frá því þegar hún fann skilaboð sem höfðu ekki náð að sendast eftir að hún skráði sig inn á Snapchat reikning sonar síns.

Þegar hún fékk loks símann hans í hendurnar fundust þar átakanleg skilaboð til vinar hans, Brad Geohegan. Debbie segir:

„Þegar við skráðum okkur inn á Snapchat Jay voru þar ósend skilaboð til Brad. Þegar þau sendust loksins fékk Brad áfall og spurði mig strax: „Ert þú á síma Jay?“ Ég svaraði já, við værum nýbúin að skrá okkur inn. Þá sagði hann: „Ég fékk rétt í þessu skilaboð frá Jay, síðustu skilaboðin hans. Þar stóð

„Heyrðu, ég mun ekki ná þessu.“ Það var eins og hann vissi að hann myndi ekki lifa þetta af.“

Sími Jay missti líklega rafhlöðuna um kl. 8:50 að morgni þegar símtali hans við vinkonu sína, Lucy Law, lauk. Í heimildarmyndinni má heyra neyðarsímtal hennar í spænska lögregluna, þar sem hún segir: „Jay sagði að hann væri að fara að deyja þarna uppi.“

Lucy, sem hafði þekkt Jay í um sex ár, var síðasta manneskjan sem talaði við hann. Í símtalinu við lögregluna útskýrði hún:

„Vinur minn kynntist einhverjum sem keyrðu hann upp í fjöllin. Ég veit ekki hvers vegna. Hann fór út úr húsinu og ég sagði honum að fara aftur til vina sinna og fá þá til að keyra hann aftur niður, en hann sagði: „Nei, ég get það ekki.“ „Ég veit ekki af hverju.“

Þegar lögreglan spurði hvort hann hefði óskað eftir björgun svaraði Lucy: „Já, hann sagði að hann fyndi að hann væri að fara að deyja þarna uppi. Og svo slitnaði símtalið.“

Þessi hljóðupptaka úr símtalinu hefur aldrei áður verið birt og varpar nýju ljósi á atburðina 17. júní.

Ný heimildarmynd Channel 4, The Disappearance of Jay Slater, verður frumsýnd um næstu helgi. Hún inniheldur áður óbirtar upptökur úr öryggismyndavélum, hljóðupptökur sem ekki hafa verið gerðar opinberar fyrr, óuppsend skilaboð og fylgir fjölskyldu Slater í leit þeirra að sannleikanum um hvað varð um Jay.