Hlaðvarpið Stokkið í eldinn er eitt af áhugaverðustu hlaðvörpum undanfarinna ára en það hóf göngu sína snemma árs 2023 og er algengilegt á flestum streymisveitum.

Þátturinn fjallar um þungarokk og er bæði snert á íslensku og erlendu þungarokki. Sem dæmi má nefna nýlegan þátt þar sem Andri Freyr Viðarsson, oft þekktur sem Andri á flandri, mætti til að ræða um hljómsveitina Cannibal Corpse og Deftones-þáttur þar sem Björn Stefánsson, sem var í Mínus, og Bóas Hallgrímsson, söngvari Reykjavík!, ræddu sveitina.

Það eru þó þeir Hörður Ólafsson og Birkir Fjalar Viðarsson sem stýra þættinum og heyrði Mannlíf í Birki til að ræða þáttinn og tónlistarmenningu á Íslandi.

AC/DC kom þeim á bragðið

„Ég hef verið að hlusta á hlaðvörp síðan 2009,“ sagði Birkir um upphaf þáttarins. „Fljótlega fór ég að hugsa um að gaman væri að gera svona lagað líka en vildi þó ekki gera bara „eitthvað.“ Þessar pælingar maríneruðu í höfðinu á mér árum saman þar til einn dag er aldarvinur minn, Smári Tarfur, mesti AC/DC aðdáandi og fræðingur landsins, sagði mér að hann væri kominn með nóg af AC/DC og ætlaði aldrei að hlusta á það framar,“ heldur Birkir áfram.

„Þá laust því í höfuðið á mér að sniðugt væri að búa til heimild um Smára Tarf að gera upp feril sveitarinnar og fara djúpt í öll þeirra lög frá upphafi til dagsins í dag. Það var í mars 2021. Ég vissi auðvitað að Tarfurinn væri vanur tökkum og glúrinn hvað allt þannig snertir en alls ekki ég. Því fór sem fór að ég bauð honum að vera með mér í AC/DC þátta allra AC/DC þátta. Hann var tilbúinn í verkefnið og úr varð hlaðvarpsþáttaröð sem ég er ákaflega stoltur af. Fullt af flottum gestum og talað um AC/DC af alúð, innlifun sem og á aðhaldslegum nótum.  Svo þegar við vorum búnir að fjalla um öll þau hljóðverslög og plötur sem AC/DC hafði gefið út þá var ég fljótur að tjá vini mínum að þetta gæti ekki endað svona. En Smári vildi ekki meira hlaðvarp,“ segir Birkir en það var svo jólin 2022 sem hann náði að plata Smára í að gera nýtt hlaðvarp sem myndi fjalla um þungarokk, bæði á Íslandi og erlendis.

Nýr maður kemur inn

„Ég fór ansi létt með að gabba minn mann í þetta verkefni enda leist honum strax vel á hugmyndina og útgangspunkta mína. Smári er þannig maður að hann á erfitt með að þykjast ekki vera peppaður. Þannig að ég vissi að ég hafði náð honum. Rúmlega mánuði síðar var fyrsti Stokkið í eldinn hlaðvarpsþátturinn kominn á netið. Persónulega finnst mér fátt skemmtilegra og meira gefandi en að masa um tónlist og tala við fólk um hana,“ en Smári sagði þó nýlega skilið við þáttinn og tók Hörður Ólafsson við honum.

„Ekkert eðlilega safaríkur náungi. Við erum búnir að gera nokkra þætti saman og hlustendur okkar eru sáttir við hans framlag svo vægt sé til orða tekið.“

Voru með þátt á X-inu

Um nokkurt skeið héldu Smári og Birkir úti útvarpsþætti með sama nafni en þátturinn var á X-inu en seint á síðasta ári við þátturinn tekinn af dagskrá eins og margir aðrir þættir. „Það var frábært að vera þessi ár á X977,“ segir Birkir. „Þar gafst okkur kostur á að spila allskonar gott þungarokk fyrir landann. Pælingin þar var allt önnur en hlaðvarpið þótt útvarpsþátturinn héti sama nafni. Á X977 vorum við með sérþátt til að spila tónlist en í hlaðvarpinu er lítið spilað af tónlist en endalaust kafað ofan í hana með „munnlegum ritgerðum“ og samtali, ef svo má segja. En já, það var mjög lærdómsríkt og skemmtilegt að fá að grúska svona svakalega mikið í lagavali og auðvitað læra af köllunum á X977 sem og auðvitað það dýrmætasta; samskipti við hlustendur og hljómsveitir á Íslandi.“

Flest allt í toppmálum

„Staðan er með afbrigðum góð, tónlistar- og sköpunarlega,“ vill Birkir meina en hann er sjálfur söngvari harðkjarnasveitarinnar I Adapt. „Ég get fullyrt að aldrei nokkurn tíman hefur verið jafn mikil gróska og fjölbreytni og gæðin á sumum hljómsveitum og verkefnum eru ævintýraleg. Við erum með læk sem er löngu búinn að flæða yfir bakka sína, í jákvæðri merkingu þeirrar setningar, en afar fá rými fyrir sveitirnar til að koma fram í. Skömm sveitarfélaga og stjórnvalda er mikil hvað það snertir. En þau kunna ekki að skammast sín heldur halda áfram að gorta sig á gæðum íslenskrar tónlistar. Þið afsakið framhleypnina í mér,“ segir Birkir en segir einnig spennandi tíma framundan í þungarokkstónleikum á Íslandi.

„Við höfum oft rætt hversu margar tónlistarhátíðir eru í svona fámennu landi sem og kosti og galla þeirrar staðreyndar. Komumst að því að það mætti fækka hátíðum lítið eitt en einungis ef það verður vænlegt að halda smærri tónleika í mismunandi rýmum. Vonandi verða „venjulegir" tónleikar nýjasta æðið 2026 en hátíðirnar eru auðvitað geggjaðar. Við elskum þær. Ég er spenntur fyrir Sátunni og Norðanpaunkinu svo dæmi séu nefnd. Það eru samkomum sem þú getur farið „blint“ á ef svo má segja. Að bandaríska undrið High On Fire muni spila í Iðnó 24. ágúst næstkomandi er auðvitað alveg gaggalagú. Nýtt efni frá Gaddavír kítlar mann sem og innkoma dauðarokkssveita eins og Barnaveiki og Afturgöngu. Svo fer að koma tími á almennilegt útspil frá Geðbrigði,“ segir Birkir að lokum.