Söngkonan Stefanía Svavarsdóttir og tónlistarmaðurnn Gísli Gunnar Didriksen Guðmundsson hafa trúlofast eftir fjögurra ára samband. Stefanía greindi frá tíðindunum á samfélagsmiðlum þar sem hún birti myndband af bónorðinu og sagði frá því hvernig það bar að.

Að sögn Stefaníu taldi hún sig vera á leið í hefðbundna bústaðarferð með vinum sínum og Gísla þarsíðustu helgi, án þess að hafa hugmynd um hvað stæði til. Vinahópurinn hafi hins vegar unnið leynilega með Gísla að skipulagningu bónorðsins.

Í færslu sinni segir Stefanía að ýmislegt hafi verið reynt til að lokka hana út úr bústaðnum svo hægt væri að undirbúa óvænta stundina. Það hafi þó ekki gengið fyrr en vinur hennar bauð henni í svokallaðan „trúnórúnt“. Þegar hún kom aftur beið Gísli hennar með hring og hún samþykkti bónorðið án þess að hika.