Breska samfélagsmiðlastjarnan Antonia Higham hefur vakið hörð viðbrögð og mikla umræðu eftir að hún greindi frá því að hafa gengist undir umfangsmikla andlitslyftingu, aðeins 28 ára gömul. Higham opnaði sig um erfiðan bata og mikið neteinelti sem hún mátti þola í kjölfarið.
Antonia Higham, sem búsett er í London, greindi fylgjendum sínum frá því á samfélagsmiðlinum TikTok að hún hefði ferðast til Tyrklands til að gangast undir andlitslyftingu, augnaðgerð og varalyftingu. Ákvörðunin var tekin eftir að læknir tjáði henni tveimur árum áður að andlit hennar væri farið að síga.
Uppnefnd „E.T.“ á batatímabilinu
Higham sýndi ferlið og batann ófilterað á miðlum sínum en myndböndin vöktu fljótt óhug hjá mörgum. Á fyrstu dögunum eftir aðgerðina var andlit hennar gríðarlega bólgið, afmyndað og teygt.
„Fólk var hrætt við að horfa á mig,“ sagði Higham þegar hún lýsti ástandinu. Hún greindi frá því að netverjar og fólk í kringum hana hefðu líkt henni við geimveru og uppnefnt hana „E.T.“ vegna útlitsins á meðan bólgan var sem mest. Hún lýsti batatímabilinu sem miklu tilfinningalegu álagi og vegna gríðarlegs þrýstings í andlitinu.
Samfélagsmiðlar sögðu læknana ganga of langt
Viðbrögð fylgjenda og almennings létu ekki á sér standa og mætti Higham miklu bakslagi. Margir lýstu yfir áhyggjum og reiði yfir því að skurðlæknar skyldu samþykkja að framkvæma svo stóra aðgerð á 28 ára gamalli konu sem sýndi engin merki um öldrun.
Gagnrýnendur sögðu málið sýna sorglega þróun á óraunhæfum fegurðarstöðlum samfélagsmiðla og töldu sumir að Higham hefði fremur þurft á sálfræðiaðstoð að halda en lýtalækningum. Aðrir gengu svo langt að segja að aðgerðin hefði látið hana líta út fyrir að vera eldri en hún er.
Þrátt fyrir harða gagnrýni og erfiða reynslu á batatímabilinu hefur Higham lýst því yfir að hún sjái ekki eftir neinu. Þegar bólgan sjatnaði sagðist hún vera afar ánægð með lokaniðurstöðuna og að henni liði loksins vel í eigin skinni.
