Tveir létust í loftárásum Ísraelshers á Gasasvæðinu í dag, þar á meðal háttsettur lögreglumaður í Gasaborg. Þetta var annar dagurinn í röð sem Ísraelsher gerði loftárásir á svæðið eftir nokkurra daga hlé.
Ísraelsher greindi frá því að skotmark árásar á Khan Yunis hefði verið Hamas-liði sem sagður var hafa skipulagt árásir gegn ísraelskum hermönnum. Herinn sagði árásina hafa verið gerða til að eyða ógn við hermenn og að ráðstafanir hefðu verið gerðar til að draga úr hættu á mannfalli meðal almennra borgara.
Almannavarnir á Gasa greindu frá því að einn hefði látist í loftárás vestur af Khan Yunis. Nasser-sjúkrahúsið staðfesti að lík manns hefði verið flutt þangað eftir árásina.
Í annarri árás var bifreið skotmark Ísraelshers í Sheikh Ajlin-hverfinu í Gasaborg. Einn lést og nokkrir særðust. Al-Shifa-sjúkrahúsið greindi frá því að hinn látni hefði verið Jamal Abu Kamil, yfirmaður lögreglunnar í Gasaborg.
Innanríkisráðuneyti Gasa sagði Abu Kamil hafa verið ráðinn af dögum í ísraelskri loftárás á bifreið hans á Al-Rashid-götu. Ísraelsher sagðist vera að kanna fregnir af árásinni.
Loftárásir hófust á ný á miðvikudag eftir hlé frá 3. ágúst. Hléið kom í kjölfar friðarumleitana Bandaríkjastjórnar og yfirlýsingar Donalds Trump Bandaríkjaforseta um mikilvægan áfanga í viðleitni til að binda enda á stríðið.
Hamas hafði lýst yfir vilja til afvopnunar en Benjamin Netanyahu, forsætisráðherra Ísraels, hafnaði á sunnudag fyrirhugaðri brottför ísraelskra hersveita frá Gasasvæðinu.
Heilbrigðisyfirvöld á Gasa segja 1.260 Palestínumenn hafa fallið í aðgerðum Ísraelshers frá því vopnahlé tók gildi. Ísraelsher hefur tilkynnt um fimm fallna hermenn á sama tímabili.
