Lögreglumaður í Arkansas í Bandaríkjunum hefur sætt gagnrýni eftir að myndbandsupptaka sýndi hann fella 18 ára konu í götuna og slá hana við handtöku. Lögmaður konunnar krefst þess að málið verði rannsakað formlega.
Atvikið átti sér stað 1. ágúst þegar Alisa Hackett var stöðvuð við akstur. Lögreglumaðurinn Moisses Arellano hafði samkvæmt skýrslu mælt hana á 71 mílna hraða þar sem hámarkshraði var 60 mílur á klukkustund.
Myndbandsupptaka úr lögreglubifreið sýnir Arellano fyrirskipa Hackett að leggja hendur á skott bifreiðarinnar og færa sig aftur á bak. Skömmu síðar fellir hann hana harkalega í götuna og slær hana. Hackett sést og heyrist ítrekað spyrja hvað hún hafi gert og biðja um að fá að hringja í móður sína.
Arellano sagði í skýrslu um valdbeitinguna að áfengisflaska hefði fundist í farþegasæti bifreiðarinnar en Hackett hefur ekki náð aldri til að kaupa áfengi í Bandaríkjunum. Hann kvaðst jafnframt hafa ákveðið að handtaka hana eftir að hafa komist að því að hún hefði fengið aðvörun í sambærilegu umferðarstoppi nokkrum dögum áður.
Samkvæmt frásögn lögreglumannsins dró Hackett handleggina undan honum og neitaði að velta sér yfir á magann. Hann kvaðst því hafa slegið hana einu höggi með krepptum hnefa til að fá hana til að hlýða fyrirmælum.
Mannréttindalögmaðurinn Ben Crump hefur krafist þess að ríkislögreglan í Arkansas hefji formlega rannsókn á valdbeitingunni, birti niðurstöður hennar opinberlega og afhendi upplýsingar um mögulegar fyrri kvartanir eða skýrslur vegna Arellano.
Almannavarnaráðuneyti Arkansas segir að öll tilvik þar sem lögreglumenn beita valdi séu tekin til innri skoðunar samkvæmt hefðbundnu verklagi.
