Angjelin Sterkaj, sem dæmdur var í sextán ára fangelsi fyrir morðið á Armando Beqirai í Rauðagerði árið 2021, hefur fengið reynslulausn og verið vísað úr landi. Hann sætir jafnframt endurkomubanni til Íslands.

Ragna Bjarnadóttir fangelsismálastjóri staðfesti þetta í samtali við Vísi. Reynslulausnin byggir á nýlegri bráðabirgðalagabreytingu sem heimilar að erlendum föngum, sem ákveðið hefur verið að vísa úr landi, sé veitt reynslulausn þegar þriðjungur refsitímans er liðinn.

Angjelin var dæmdur í sextán ára fangelsi í Hæstarétti 21. júní 2023. Samtals hafði hann setið í gæsluvarðhaldi og fangelsi í 2.004 daga þegar honum var sleppt, eða rúmlega fimm ár og fimm mánuði. Þriðjungur sextán ára refsingar nemur 1.947 dögum.

Armando Beqirai, 33 ára fjölskyldufaðir frá Albaníu, var skotinn níu sinnum fyrir utan heimili sitt í Rauðagerði 13. febrúar 2021.