Nokkuð var um verkefni hjá lögreglunni á höfuðborgarsvæðinu í dag, meðal annars vegna umferðarslyss, líkamsárásar, þjófnaða og umferðarlagabrota.

Lögreglu barst tilkynning um umferðarslys þar sem ökumaður rafhlaupahjóls og ökumaður rafmagnsreiðhjóls lentu saman. Einn var fluttur á bráðamóttöku vegna slyssins en ekki liggja fyrir upplýsingar um líðan viðkomandi.

Í öðru tilviki stöðvaði lögregla einstakling á rafhlaupahjóli þar sem því var ekið vel yfir 25 kílómetra hraða á klukkustund. Rafhlaupahjólið var haldlagt í þágu rannsóknar málsins.

Þá var einstaklingur handtekinn, grunaður um líkamsárás og hótanir. Málið er til rannsóknar hjá lögreglu.

Nokkrar tilkynningar bárust vegna þjófnaða. Tveir þjófnaðir í verslunum voru afgreiddir á vettvangi en önnur þjófnaðarmál, þar á meðal innbrot og þjófnaður, eru til rannsóknar.

Ökumaður var stöðvaður við akstur og kom í ljós að hann hafði verið sviptur ökuréttindum. Annar ökumaður var sektaður fyrir að nota ekki handfrjálsan búnað við akstur.

Lögreglu bárust einnig tilkynningar um tvo einstaklinga í annarlegu ástandi en þegar lögreglumenn komu á vettvang fundust þeir ekki. Þá var óskað eftir aðstoð vegna óvelkomins einstaklings. Sá reyndist dónalegur í garð lögreglu en yfirgaf að lokum vettvang.