Borgarráð hefur samþykkt sölu fasteigna Ísaksskóla við Bólstaðarhlíð í Reykjavík til sjálfseignarstofnunar Skóla Ísaks Jónssonar. Kaupverðið er 456,8 milljónir króna en borgin greinir frá þessu í tilkynningu.

Verðið byggir á kaupverði Reykjavíkurborgar frá árinu 2011, uppreiknuðu samkvæmt byggingarvísitölu, auk verðmats á færanlegri kennslustofu og tillits til viðhaldsframkvæmda sem borgin hefur fjármagnað undanfarin ár.

Reykjavíkurborg keypti húsnæðið af sjálfseignarstofnuninni árið 2011. Í samningnum var gert ráð fyrir að skólinn gæti eignast húsnæðið á ný þegar fjárhagsstaða hans leyfði. Skólinn hefur síðan leigt húsnæðið af borginni.

Með nýjum kaupsamningi falla núverandi leigusamningar úr gildi. Reykjavíkurborg fær jafnframt forkaupsrétt að fasteignunum verði þær síðar seldar til utanaðkomandi aðila. Forkaupsrétturinn gildir ekki verði eignarhaldið fært til tengdra félaga eða lögaðila undir yfirráðum skólans.