Sigurður Gísli Bond Snorrason, fyrrverandi knattspyrnumaður og fótboltasérfræðingur, er mættur aftur í sviðsljósið eftir að hafa lítið látið fyrir sér fara undanfarna mánuði. Sigurður er gestur í nýjasta þætti hlaðvarpsins Dr. Football sem Hjörvar Hafliðason stjórnar.
Sigurður vakti mikla athygli í sumar þegar enska YouTube-stjarnan Morgan Lee Burtwistle, betur þekktur sem AngryGinge, sakaði hann um kynþáttaníð á leik Englands og Gana í L-riðli heimsmeistaramóts karla í knattspyrnu í Foxborough.
Burtwistle sakaði Sigurð um að hafa viðhaft niðrandi ummæli í garð leikmanna Gana og tilkynnti atvikið til öryggisgæslu á leikvanginum. Hann krafðist þess að Sigurði yrði vísað af svæðinu. Að sögn Burtwistle fékk Sigurður þó aðeins aðvörun og mátti vera áfram á leiknum, en fékk ekki að snúa aftur í sama sæti.
Í myndskeiði sem Burtwistle birti á TikTok sást Sigurður biðjast afsökunar á ummælum sínum.
„Ég biðst afsökunar á ummælum mínum um leikmenn Gana. Þetta kemur ekki fyrir aftur, getum við ekki gleymt þessu?“ sagði Sigurður en ekki hefur greint frá því hvað hann sagði nákvæmlega.
Burtwistle sagði ummælin óásættanleg og lagði áherslu á að fordómar ættu ekki heima í knattspyrnu.
Hann fjallaði síðar aftur um málið og sagðist hafa fengið fjölmörg skilaboð um að maðurinn væri Íslendingur og fyrrverandi knattspyrnumaður. Þá sagði Burtwistle að fjórir vinir hans hefðu einnig heyrt ummælin.
Sigurður var á þessum tíma staddur í Bandaríkjunum í boði veðmálafyrirtækisins Coolbet ásamt hópi Íslendinga.
Mikill fjöldi erlenda fjölmiðla hefur fjallað um málið og er sagt að FIFA hafi verið beðið að skoða atvikið nánar.
Sigurður hefur ekki svarað spurningum Mannlífs varðandi atvikið.
