Enska YouTube-stjarnan Morgan Lee Burtwistle, betur þekktur sem AngryGinge, lenti í orðaskaki við Sigurð Gísla Bond Snorrason, fótboltasérfræðing Dr. Football og fyrrum knattspyrnumann, á leik Englands og Gana í L-riðli heimsmeistaramóts karla í knattspyrnu sem fram fór í Foxborough á þriðjudag.

Burtwistle sakaði Sigurð Gísla um kynþáttaníð í garð leikmanna Gana og tilkynnti atvikið til öryggisgæslu á leikvanginum. Hann krafðist þess að Íslendingnum yrði vísað af svæðinu en samkvæmt honum fékk Sigurður aðeins aðvörun og var heimilt að vera áfram á leiknum en þó virðist hann ekki hafa fengið að snúa aftur í sama sæti ef marka má Burtwistle.

Í myndskeiði sem Burtwistle birti á TikTok sést Sigurður biðjast afsökunar á ummælum sínum.

„Ég biðst afsökunar á ummælum mínum um leikmenn Gana. Þetta kemur ekki fyrir aftur, getum við ekki gleymt þessu?“ sagði hann.

Burtwistle sagði ummælin óásættanleg og lagði áherslu á að fordómar ættu ekki heima í knattspyrnu. Sigurður er staddur í Bandaríkjunum í boði veðmálafyrirtækisins Coolbet ásamt hópi Íslendinga að sögn Morgunblaðsins.

Burtwistle ákvað að tjá sig meira um málið í nýju myndbandi. Endurtók hann að ýmsu leyti sem hann sagði í fyrra myndbandi sínu en tók fram að hann hefði fengið fjölda skilaboða þar sem honum hafi verið sagt að um íslenskan mann væri að ræða og sá væri fyrrverandi knattspyrnumaður. Í myndbandinu segir Burtwistle að hann og fjórir vinir hans hafi allir heyrt í Sigurði svo það fari ekkert á milli mála að það hafi verið hann.

„Það sem hann var að segja var galið, í alvöru talað, algjörlega galið,“ segir Burtwistle meðal annars í nýja myndbandinu.

Mannlíf sendi Sigurði fyrirspurn um málið í morgun en hann hefur ekki svarað henni.