Muhammad Younas, framkvæmdastjóri og eigandi hjólbarðafyrirtækisins Iceland tire ehf., hefur verið dæmdur í 16 mánaða fangelsi fyrir meiri háttar brot gegn skatta- og bókhaldslögum. Fangelsisrefsingin er skilorðsbundin til tveggja ára.

Málið varðaði rekstur Iceland tire á árunum 2017 til 2022. Samkvæmt ákæru voru rekstrartekjur félagsins vanframtaldar um tæpar 174 milljónir króna vegna rekstraráranna 2018 til 2021 og skattskyldur hagnaður um rúmar 170 milljónir. Vangreiddur tekjuskattur vegna þessa nam rúmum 34 milljónum króna.

Þá voru virðisaukaskattsskýrslur félagsins rangar og nam vangreiddur virðisaukaskattur samtals tæpum 64,5 milljónum króna. Einnig var Muhammad ákærður fyrir að hafa rangfært bókhald félagsins, meðal annars með því að gefa ekki út sölureikninga vegna hluta sölunnar og gefa út reikninga án þess að raunveruleg sala lægi að baki.
Muhammad neitaði sök og byggði vörn sína meðal annars á því að hann hefði falið bókhaldsstofu að sjá um bókhald, framtöl og skattskil fyrirtækisins. Hann sagðist ekki kunna að lesa eða skrifa íslensku og hafa treyst bókara sínum til að sjá um þessi mál.

Dómurinn féllst ekki á þær málsvarnir. Þar kemur fram að Muhammad hafi verið stjórnarmaður, framkvæmdastjóri og prókúruhafi félagsins og því borið ábyrgð á því að starfsemi og bókhald þess væru í samræmi við lög. Að fela bókhaldsstofu verkefnin hafi ekki firrt hann þeirri ábyrgð. Dómurinn taldi háttsemi hans fela í sér stórfellt hirðuleysi.
Við ákvörðun refsingar var meðal annars horft til þess að brotin vörðuðu umtalsverðar fjárhæðir og stóðu yfir í langan tíma. Muhammad hafði þó ekki áður sætt refsingu.

Muhammad og félagið voru jafnframt dæmd til að greiða óskipt rúmlega 295,6 milljóna króna sekt í ríkissjóð.

Verði sektin ekki greidd innan fjögurra vikna skal Muhammad sæta 360 daga fangelsi.