Lögreglan á höfuðborgarsvæðinu hafði í nógu að snúast í nótt og kom meðal annars að tveimur aðskildum heimilisofbeldismálum. Í báðum tilvikum var einstaklingur vistaður í fangageymslu vegna rannsóknar máls.
Lögreglu barst einnig tilkynning um tvo mjög ölvaða einstaklinga. Annar þeirra var fluttur á brott með sjúkrabíl en hinn var sóttur af aðstandanda.
Þá varð umferðarslys þar sem fjarlægja þurfti tvö ökutæki með dráttarbifreið. Einn var vistaður í fangageymslu vegna rannsóknar málsins, en grunur leikur á að hann hafi ekið ölvaður og án ökuréttinda.
Ökumaður var jafnframt handtekinn grunaður um akstur undir áhrifum fíkniefna og sviptur ökuréttindum. Innan sömu klukkustundar hafði lögregla aftur afskipti af sama ökumanni vegna aksturs án réttinda. Þá var annar ökumaður stöðvaður vegna gruns um ölvunarakstur.
Einn var vistaður vegna húsbrots eftir að hafa farið inn á hótel í vímuástandi. Lögregla hafði einnig afskipti af ökumanni sem ók gegn einstefnu, tók skráningarmerki af ótryggðri bifreið og miðlaði málum í ágreiningi milli strætóbílstjóra og farþega.
