Aðstandendur og íbúar í samfélaginu í Hrunamannahreppi hafa lýst harmi sínum eftir að Víglundur Þorsteinsson, 10 ára gamall bráðger og atorkusamur drengur, lést af slysförum í fyrradag.

Kvenfélag Hrunamannahrepps hefur stofnað til söfnunar fyrir fjölskyldu hans.

Víglundur ungi bjó í Haukholtum ásamt foreldrum sínum og þremur systkinum. Ættingjar hans og samferðafólk hafa lýst einstökum dugnaði hans og hjálpsemi. Slysið varð þegar dráttarvél féll af háum árbakka Hvítár, en bærinn liggur þar nærri.

Í opinni færslu Kvenfélags Hrunamanna er boðað til söfnunar, sem sjá má neðar í fréttinni.

„Þann 28. maí síðastliðinn varð skelfilegt slys á bænum Haukholtum í Hrunamannahreppi þar sem 10 ára drengur, Víglundur Þorsteinsson, lét lífið. Við viljum leggja okkar að mörkum til að foreldrarnir geti fengið svigrúm til að syrgja og hlúa að hvort öðru og þremur öðrum börnum sínum. Því hefur verið hafin söfnun til að styðja við fjölskylduna á þessum erfiðu tímum,“ segir í skilaboðum kvenfélagsins.

Óskar Hafsteinn Óskarsson, sóknarprestur í Hrunaprestakalli, lýsti því í samtali við Morgunblaðið í dag að fráfall Víglundar „snert­i hvert ein­asta heim­ili í sveit­inni“. „Þessi dreng­ur var hér stór part­ur af lífi okk­ar svo margra,“ sagði hann.

Auður Styrkársdóttir, stjórnmálafræðingur, kennari, blaðamaður og skáld, kveður Víglund í opinni færslu á Facebook í kvöld, en hann var sonardóttursonur hennar og Svans Kristjánssonar stjórnmálafræðings.

„Sá harmur er að okkur kveðinn að elskulegur sonardóttursonur, Víglundur Þorsteinsson, lést af slysförum þann 28. maí síðastliðinn, rétt tíu ára gamall,“ segir hún og lýsir atgervi hans.

„Hann var dáðadrengur hinn mesti, hjálparhellan besta, ljúflingur sinnar ættar, ljómi sinnar sveitar. Hinn mætasti þjóðfélagsþegn. Minningin lifir. Við þökkum hverja stund.“