Yfirvöld á Tenerife undirbúa nú komu skemmtiferðaskipsins MV Hondius sem væntanlegt er til eyjarinnar snemma á sunnudagsmorgun eftir að upp kom hantaveirusmit um borð.

Lögreglumenn frá Guardia Civil og starfsfólk hafnaryfirvalda í Santa Cruz de Tenerife hófu á föstudag umfangsmikinn undirbúning við höfnina í Granadilla, sunnanlega á eyjunni.

Þar hafa þegar verið sett upp tímabundin öryggishús, lækningatjöld og stjórnstöð vegna komu skipsins, sem er með 144 manns um borð, þar af 14 spænska ríkisborgara.

Skipið er á leið frá Grænhöfðaeyjum og er gert ráð fyrir að það komi að Tenerife einhvern tímann á milli klukkan þrjú og fimm aðfaranótt sunnudags, þó sumar siglingaspár geri ráð fyrir seinni komu.

Samkvæmt stjórnvöldum á Kanaríeyjum mun skipið leggjast fyrir akkeri innan hafnarsvæðisins en ekki við bryggju. Yfirvöld segja að það sé gert vegna veðurskilyrða og sjávaraðstæðna sem geti torveldað aðgerðir utan hafnarinnar.

Aðgangur að Granadilla-höfn verður takmarkaður meðan viðbragðsáætlanir eru í gangi og stefnt er að því að flytja farþega frá skipinu og skipuleggja heimflutning þeirra eins fljótt og auðið er.

Yfirvöld hafa einnig kallað eftir nánu samstarfi neyðarþjónustu og hafnaryfirvalda til að tryggja að skipið geti haldið aftur af stað fyrir þriðjudag, þar sem búist er við versnandi veðri og sjógangi frá þeim tíma.

Mikill fjöldi fjölmiðlafólks frá Spáni og öðrum Evrópulöndum hefur safnast saman við höfnina til að fylgjast með framvindunni.