Umhverfis-, orku- og loftslagsráðherra, Jóhann Páll Jóhannsson, segir ríkisstjórnina hafa áform um frekari skref til að jafna dreifkostnað til kaupenda raforku um allt landið.
Fulltrúar Múlaþings hafa lýst því sem tvískinnungi að íbúar sem búa nálægt virkjunum greiði álag sem þeir sem eru fjær þurfa ekki að gera.
Kemur fram á vefmiðlinum Austurfrétt að Jóhann Páll hafi þegar lagt til hækkun jöfnunargjalds sem og dreifbýlisframlags er hann segir að muni lækka mánaðarlegan kostnað kaupenda í dreifbýli um 20 prósent frá og með 1. júlí næstkomandi.
Bæði á vorfundi Rarik í apríl og á fundi orkusveitarfélaga á mánudag boðaði Jóhann Páll ennþá stærri skref til jöfnunar á raforkukostnaði í haust.
Á þessum fundi var einnig Jónína Brynjólfsdóttir, sem er forseti sveitarstjórnar Múlaþings, einnig með erindi þar sem hún lýsti yfir ánægju sinni með breytingarnar. Jónína benti á tvískinnung þess að foreldrar hennar í Reykjavík greiddu ekkert gjald af flutningi raforku er framleidd væri á Þjórsársvæðinu á meðan íbúar nærri virkjunum þyrftu að gera það.
Kemur fram að Berglind Harpa Svavarsdóttir, sem er formaður byggðaráðs Múlaþings, ræddi þetta einnig á fundi er Landsnet hélt á Egilsstöðum í byrjun maí. Þar sagði Berglind að ekki gengi að uppbygging dreifikerfis raforku byggði algjörlega á því að orka væri flutt frá Austurlandi til annarra notenda; seld þar á lægra verði. Berglind kallaði eftir því að stjórnvöld jöfnuðu dreifikostnað milli þéttbýlis og dreifbýlis, að hennar mati kæmi ekkert annað til greina.
Þær stöllur Jónína og Berglind ræddu hvernig skilgreiningar dreifiveitna á dreifbýli falli ekki saman við skilgreiningar sveitarfélaga. Sagði Jónína slíkt hafa afleiðingar - til dæmis fyrir Múlaþing - sem hefur skipulagt atvinnusvæði við Valgerðarstaði norður af Fellabæ. Það er dreifbýli samkvæmt skilgreiningu Rarik og því bætist við álag á raforkuna:
„Þetta er okkar stærsta iðnaðarsvæði og þangað beinum við áhugasömum fyrirtækjum. En af því að Rarik vill meina að þarna eigi að vera dreifbýlisgjald telja fyrirtækin ekki borga sig að fara í uppbyggingu. Þess vegna er þetta dauðasvæði,“ sagði Jónína. Hún bætti við að álagið hindraði líka atvinnuuppbyggingu til sveita. „Það ætti að verðlauna landssvæðin fyrir framleiðslu með forgangi að orku fyrir sín samfélög, bæði til atvinnulífs og vaxtar samfélagsins,“ sagði Berglind Harpa.
