Maðurinn sem lést á Esjunni í gær hét Viktor Armann Kambizson.

Móðir Viktors, Hrönn Blöndal Harðardóttir, kveður hann í færslu á Facebook í dag. Þar þakkar hún þeim sem leituðu hans og upplýstu hana um stöðu mála.

„Þessi fallegi, skemmtilegi yndislegi drengur, hann Viktor minn er látinn. Aðeins 22 ára gamall. Hann er göngumaðurinn sem var leitað að í Esjunni í vikunni. Hann fórst af slysförum í hlíðum Kistufells,“ segir hún.

„Við færum björgunarsveitarfólki sem leitaði tímunum saman og langt fram á nótt okkar bestu þakkir. Sem og áhöfn þyrlunnar sem fann drenginn minn. Og lögreglunni sem hélt utan um okkur og gaf reglulega upplýsingar um stöðu mála. Og þeim sem komu heim til okkar og tilkynntu andlátið. Fyrir nærgætni og hlýju. Góður drengur er fallinn frá, allt of snemma. Elsku Viktor minn, hvíldu í friði.“

Hrönn birtir myndir af syni sínum á mismunandi tímum lífsins. Meðal annars sýnir hún son sinn ungan á Esjunni, þar sem hann náði toppnum aðeins tíu ára gamall. Hún birtir einnig mynd af honum á Esjunni síðasta daginn. „Örlagaríkur dagur sem endaði með andláti Viktors. Hvíl í friði, uns við hittumst á ný,“ skrifar hún við myndina.