Ugla Stefanía Kristjönudóttir Jónsdóttir hefur stefnt Eldi Smára Kristinssyni Ísidór fyrir Héraðsdóm Reykjavíkur vegna ummæla sem birtust á samfélagsmiðlunum Facebook og X í október 2023. Krefst hún þess að ummælin verði dæmd dauð og ómerk, auk þess sem hún fer fram á tvær milljónir króna í miskabætur.

DV greindi fyrst frá málinu.

Samkvæmt stefnunni telur Ugla að ummælin feli í sér alvarlegar og ærumeiðandi ásakanir sem vegi að æru hennar og mannorði. Hún segir ummælin meðal annars fela í sér órökstuddar ásakanir um refsiverða háttsemi gagnvart börnum og að þau séu hluti af umfangsmikilli ófrægingarherferð sem Eldur hafi beint gegn henni á opinberum vettvangi.

Eldur hafnar kröfunum alfarið. Í greinargerð sinni segir hann að hann hafi ekki sjálfur samið umrædda mynd eða texta heldur einungis endurbirt efni frá öðrum notanda á samfélagsmiðlinum X og lýst skoðun sinni á því. Hann neitar því að hafa sakað Uglu um barnaníð eða kynferðisbrot gegn börnum.

Eldur byggir jafnframt á því að ummælin falli undir tjáningarfrelsi og séu hluti af opinberri umræðu um umdeild málefni tengd meðferð barna með kynama.

Fyrirtaka í málinu fór fram við Héraðsdóm Reykjavíkur í dag, 9. júní.