Donald Trump, forseti Bandaríkjanna, sagði á viðburði í Flórída á föstudag að danshreyfingar hans hefðu átt stóran þátt í að gera lagið Y.M.C.A. vinsælt á ný á síðasta ári og kallaði lagið „þjóðsöng samkynhneigðra“
Lagið, sem diskóhópurinn Village People gaf út árið 1978, naut aukinna vinsælda í forsetabaráttu Trumps árið 2024 og var meðal annars mikið spilað á kosningafundum hans. Trump sagði viðstadda að lagið hefði „toppað vinsældalista mánuðum saman“, þó þær fullyrðingar séu nokkuð ýktar.
Samkvæmt upplýsingum frá Billboard var Y.M.C.A. í efsta sæti „Dance/Electronic Digital Song Sales“-listans í fimm vikur árið 2024, sem var besti árangur sveitarinnar það ár.
Á viðburðinum rifjaði Trump einnig upp dans sinn við lagið, þar sem hann sveiflar hnefum og mjöðmum í takt við tónlistina. Hann sagði eiginkonu sína, Melania Trump, hafa hvatt hann til að hætta dansinum þar sem hann þætti ekki nægilega „forsetalegur“. Þrátt fyrir það sýndi forsetinn dansspor sín á sviðinu á ný, meðal annars með því að herma eftir golfsveiflu.
Á hátíðahöldum í tengslum við embættistöku Trumps árið 2025 kom Village People fram ásamt forsetanum og dansaði með honum á sviðinu. Framkoman vakti gagnrýni frá sumum innan LGBTQ+ samfélagsins vegna stefnu Trump-stjórnarinnar í málefnum transfólks.
Söngvari sveitarinnar, Victor Willis, hefur hins vegar ítrekað hafnað því að Y.M.C.A. sé sérstaklega lag fyrir samkynhneigt fólk og sagt lagið vera ætlað öllum hópum samfélagsins. Hann hefur jafnframt gagnrýnt þá sem skilgreina lagið eingöngu sem „samkynhneigðan þjóðsöng“ og sagt slíkt geta haft neikvæð áhrif á arfleifð þess.
