Tveir starfsmenn létust og tveir til viðbótar særðust í skotárás í grunnskóla í borginni Rio Branco í Acre-fylki í norðvesturhluta Brasilíu í gær. Meðal þeirra sem særðust var ellefu ára stúlka sem hlaut skotsár á fæti. Árásarmaðurinn reyndist vera 13 ára nemandi við skólann, Sao Jose Institute, og hefur hann verið handtekinn.

Samkvæmt upplýsingum frá lögreglu Acre-fylkis gekk drengurinn inn í skólann og skaut nokkrum sinnum á gangi sem liggur að skrifstofu skólastjóra. Að lokinni árás gaf hann sig fram við lögreglu án mótspyrnu. Stjúpfaðir hans var einnig handtekinn, en hann er eigandi skammbyssunnar sem notuð var í árásinni.

Lögregla rannsakar nú hvort fleiri nemendur hafi átt þátt í skipulagningu árásarinnar. Felipe Russo, yfirmaður hjá lögreglunni, sagði að yfirvöld hefðu þegar borið kennsl á einstaklinga sem grunaðir eru um að hafa aðstoðað árásarmanninn.

Vitni lýstu mikilli skelfingu á vettvangi. Eduardo Rodrigues Cavalcante, starfsmaður hótels við hlið skólans, sagði nemendur hafa reynt að flýja með því að klifra yfir sex metra háan vegg sem skilur byggingarnar að. Hann sagðist hafa heyrt bæði skothvelli og hávær neyðaróp.

Stjórnvöld í Acre-fylki lýstu yfir samúð með aðstandendum fórnarlambanna og tilkynntu að kennsla í öllum skólum fylkisins yrði felld niður í þrjá daga. Þá hafa sálfræðiteymi verið virkjuð til að veita nemendum og starfsfólki stuðning.