Tuttugu og fjögurra ára íslenskur maður lést í fallhlífaslysi í Óðinsvéum í Danmörku skömmu fyrir hádegi í dag, samkvæmt Vísi.

Danska lögreglan á Fjóni staðfesti andlátið við fjölmiðla og segir að atvikið sé rannsakað sem slys. Neyðarkall barst um klukkan 11:30 að staðartíma og voru lögregla og sjúkraflutningamenn send á vettvang nærri Beldringe-flugvelli. Endurlífgunartilraunir stóðu yfir í um hálftíma en báru ekki árangur.

Maðurinn var ekki búsettur í Danmörku og hefur aðstandendum verið tilkynnt um andlátið.

Samkvæmt upplýsingum frá fallhlífasamfélaginu var hann þátttakandi á námskeiði hjá fallhlífamiðstöð í Óðinsvéum og var að stökkva einn í fyrsta sinn þegar slysið varð.

Framkvæmdastjóri miðstöðvarinnar segir marga hafa orðið vitni að slysinu og að þeim hafi verið boðin áfallahjálp. Fallhlífasamfélagið sé lítið og samheldið og atvikið hafi haft mikil áhrif.

Málið er nú til meðferðar hjá borgaraþjónustu utanríkisráðuneytisins sem hefur ekki veitt frekari upplýsingar að svo stöddu.