Þrjú ár eru liðin síðan Múlaþing kynnti nýtt, nútímalegt deiliskipulag fyrir miðbæ Egilsstaða og leitaði samhliða að samstarfsaðilum til að hrinda uppbyggingunni í framkvæmd. Enn sem komið er hafa engin tilboð borist í verkefnið.
Heiða Ingimarsdóttir, verkefnastjóri kynningar- og upplýsingamála hjá sveitarfélaginu, staðfestir þetta í samtali við Austurfrétt. Hún segir þó áhuga vissulega til staðar, þótt ekkert hafi enn verið staðfest.
Skipulagið, sem var samþykkt snemma árs 2022, miðar að því að skapa lifandi miðbæ og færa hann nær nútímanum með vistvænum áherslum. Áætlanir gera ráð fyrir blandaðri byggð íbúða, þjónustu og verslana auk fallegra útivistar- og samkomusvæða. Miðpunktur nýja miðbæjarins, sem hlotið hefur nafnið Straumur, á að vera göngugatan Ormurinn.
Á teikningum má sjá þjónustumiðstöð N1 í forgrunni og aftan við hana raðaðar lágbyggingar sem munu hýsa bæði íbúðir og verslanir, skammt frá núverandi húsnæði Nettó og gamla kaupfélagshúsinu.
Þörf fyrir lifandi miðbæi á Austurlandi
Skortur á virkum og líflegum miðbæjarkjörnum á Austurlandi hefur lengi verið til umræðu, og verður sú umræða tekin sérstaklega fyrir á opnum hádegisfundi á Reyðarfirði næstkomandi mánudag, undir yfirskriftinni Miðbæjarskipulag – og hvað svo?
Á fundinum munu sérfræðingar kynna verkefni sín og sýn á hvernig efla megi miðbæi, bæði á Austurlandi og víðar. Fundurinn er liður í því að fylgja eftir markmiðum Svæðisskipulags Austurlands frá 2022, sem leggja áherslu á að aðalgötur og miðbæir svæðisins verði styrktir sem þjónustu- og menningarmiðstöðvar framtíðarinnar. Allir eru velkomnir á fundinn.
