Utanríkisráðuneytið vill ekki svara því hvort íslensk stjórnvöld taki undir umdeildar fullyrðingar Marco Rubio, utanríkisráðherra Bandaríkjanna, um að róttækir vinstrisinnaðir öfgahópar séu meðal helstu hryðjuverkaógna samtímans.
Þetta kemur fram í svari ráðuneytisins við ítarlegum fyrirspurnum Mannlífs um afstöðu ríkisstjórnarinnar í kjölfar alþjóðlegs ráðherrafundar sem Rubio boðaði til 15. júlí undir yfirskriftinni The Resurgence of Political Terrorism.
Mannlíf spurði meðal annars hvort ríkisstjórnin tæki undir mat Rubio á Antifa og öðrum vinstrisinnuðum hópum, hvort Ísland hefði lýst yfir stuðningi við áherslur fundarins og hvort fundurinn hefði haft áhrif á samstarf Íslands og Bandaríkjanna á sviði hryðjuverkavarna.
Í svari ráðuneytisins segir:
„Utanríkisráðuneytið hefur engu efnislegu við fyrra svar ráðuneytisins að bæta og tjáir sig ekki um hvað fór fram á umræddum fundi.“
Ráðuneytið ítrekar jafnframt fyrri skýringu sína á þátttöku Íslands.
„Sendiherra Íslands sótti fundinn fyrir hönd Íslands til að fylgjast með umræðum.“
Áður hefur utanríkisráðuneytið staðfest við Mannlíf að það hafi verið Svanhildur Hólm Valsdóttir, sendiherra Íslands í Washington, sem sat fundinn fyrir Íslands hönd, en ekki utanríkisráðherra.
Samkvæmt ráðuneytinu var sendiherranum falið að sækja fundinn til að fylgjast með umræðum og hefur ráðuneytið ekki gefið til kynna að Ísland hafi lýst yfir stuðningi við þær áherslur sem þar voru kynntar. Jafnframt hefur það ekki svarað því hvort fulltrúi Íslands hafi gert athugasemdir við málflutning Rubio eða hvort ríkisstjórnin deili greiningu hans á vinstrisinnuðum öfgahópum.
Fundurinn vakti athygli þar sem Rubio hélt því fram að endurvakning pólitískra öfgahópa á vinstri vængnum væri alþjóðleg ógn sem ríki þyrftu að vinna saman gegn. Ummælin hafa verið umdeild, meðal annars í ljósi þess að ýmsar rannsóknir hafa bent til þess að hægri öfgahópar hafi staðið að fleiri banvænum hryðjuverkum en vinstrisinnaðir hópar í Bandaríkjunum á undanförnum árum.
Spurningar Mannlífs
- Tekur íslenska ríkisstjórnin undir þá greiningu Marco Rubio utanríkisráðherra Bandaríkjanna að róttækur vinstrisinnaður öfgahópur sé ein helsta alþjóðlega hryðjuverkaógn samtímans?
- Tekur ríkisstjórnin undir orð Rubio um að róttæk vinstrihreyfing einkennist af „eitruðum beiskleika“, leitist við að eyðileggja það sem aðrir hafa byggt upp og beiti ofbeldi og hryðjuverkum?
- Rubio hélt því fram að Antifa (sem stendur fyrir antifascists) og tengdir hópar starfi saman yfir landamæri, samhæfi aðgerðir sínar og fjármagni starfsemi sína með alþjóðlegum hætti. Deila íslensk stjórnvöld þessu mati?
- Telur utanríkisráðherra að Antifa eða sambærilegir vinstrisinnaðir hópar falli undir skilgreiningu íslenskra stjórnvalda á hryðjuverkaógn?
- Fulltrúi Íslands sat fundinn. Var hann þar eingöngu sem áheyrnarfulltrúi eða lýsti Ísland yfir stuðningi við þær áherslur sem komu fram á fundinum?
- Kom fulltrúi Íslands með athugasemdir eða andmæli við málflutning Rubio á fundinum, eða var honum tekið athugasemdalaust?
- Hefur íslenska ríkisstjórnin í kjölfar fundarins ákveðið að auka samstarf við Bandaríkin eða önnur ríki í baráttunni gegn því sem Rubio kallaði róttæka vinstrisinnaða hryðjuverkastarfsemi?
- Lítur íslenska ríkisstjórnin svo á að þessi fundur marki breytingu á samstarfi Íslands og Bandaríkjanna á sviði hryðjuverkavarna?
- Ef utanríkisráðherra tekur ekki undir orð Marco Rubio, hvers vegna ákvað Ísland þá að senda fulltrúa á ráðstefnuna? Var markmiðið eingöngu að fylgjast með umræðunni eða fól þátttakan í sér pólitískan stuðning við fundinn?
