Svanhildur Hólm Valsdóttir, sendiherra Íslands í Washington, sat alþjóðlega ráðstefnu sem Marco Rubio, utanríkisráðherra Bandaríkjanna, boðaði til um það sem bandarísk stjórnvöld kalla endurvakta ógn frá öfgahópum á vinstri væng stjórnmálanna.

Þetta staðfestir utanríkisráðuneytið í svari við fyrirspurn Mannlífs.

Ráðstefnan fór fram 15. júlí og sátu hana fulltrúar frá rúmlega 60 ríkjum, þar á meðal ráðherrar, sendiherrar og háttsettir embættismenn. Þegar fyrst var greint frá fundinum lá ekki fyrir hver hefði mætt fyrir Íslands hönd.

Samkvæmt utanríkisráðuneytinu var það Svanhildur Hólm sem sótti fundinn.

„Ísland sendi ekki utanríkisráðherra til þátttöku og var því sendiherra Íslands í Washington falið að sitja fundinn fyrir Íslands hönd til að fylgjast með umræðum,“ segir í svari ráðuneytisins.

Þar kemur jafnframt fram að Bandaríkin hafi boðið til ráðherrafundarins undir yfirskriftinni The Resurgence of Political Terrorism.

„Samkvæmt upplýsingum frá bandarískum stjórnvöldum sóttu rúmlega sextíu ríki fundinn, ýmist ráðherrar, sendiherrar eða háttsettir embættismenn.“

Fundurinn vakti athygli þar sem Trump-stjórnin hefur lagt aukna áherslu á að berjast gegn því sem hún skilgreinir sem öfgahreyfingar á vinstri væng stjórnmálanna. Marco Rubio sagði í opnunarræðu sinni að um væri að ræða alþjóðlega ógn sem ríki þyrftu að bregðast sameiginlega við.

Í frétt Time um fundinn kom hins vegar fram að fyrirliggjandi rannsóknargögn sýni að hægri öfgamenn hafi valdið fleiri banvænum árásum í Bandaríkjunum en öfgamenn á vinstri vængnum á undanförnum árum, þótt atvik tengd vinstri öfgum hafi farið fjölgandi.