Borgarfulltrúinn Brynjar Níelsson gagnrýnir harðlega það sem hann kallar aktivisma í nýrri færslu á Facebook og segir hluta aðgerðarsinna telja skoðanir sínar hafnar yfir lög og lýðræðislegar ákvarðanir.
Í færslunni fjallar Brynjar meðal annars um mótmæli gegn hvalveiðum og segir að sumir andstæðingar hvalveiða og auðlindanýtingar gangi mjög langt í aðgerðum sínum og „jafnvel valda öðrum tjóni og skapa ýmsa hættu.“
Hann nefnir jafnframt dæmi um það sem hann kallar „meinlausan aktivisma“, þar sem einstaklingur veifaði hvalsskaufa og spilaði þjóðsönginn fyrir mótmælendum hvalveiða. Að hans mati hafi viðbrögðin við þeirri gjörð verið óhófleg.
Í færslunni beinir Brynjar einnig spjótum sínum að atvinnumálaráðherra og heldur því fram að ráðherrann hafi markvisst grafið undan íslensku atvinnulífi í þeirri von að Ísland gangi í Evrópusambandið. Hann segir viðbrögð ráðherrans við umræddu atviki sýna að það hafi valdið honum verulegu uppnámi.
Brynjar vísar jafnframt til þess sem hann kallar eigin félagsfræðirannsóknir, sem hann hefur grínast með áður, á aktivistum og segir niðurstöður þeirra benda til þess að margir þeirra líti svo á að skoðanir sínar séu hafnar yfir lög. Þá telur hann að þeir beri lítið traust til lýðræðis nema niðurstöður falli að þeirra eigin sjónarmiðum.
Að lokum segir Brynjar að slíkir einstaklingar hefðu áður fyrr verið kallaðir öfgamenn þegar hugtökin hefðu verið notuð með skýrari hætti.
