Mikill verðmunur er á algengum bökunarvörum milli verslana hér á landi, samkvæmt nýjum verðkönnunum Verðlagseftirlits ASÍ. Munurinn getur numið allt að 66 prósentum á sömu vöru og því getur borgað sig fyrir neytendur að bera saman verð áður en innkaupin eru gerð.
Verðkönnunin sýnir einnig að töluverður munur getur verið á sambærilegum vörum innan sömu verslunar, eða á bilinu 9 til 29 prósent. Með því að velja ódýrara vörumerki má því spara umtalsverðar fjárhæðir án þess að skipta um verslun.
Sykur og súkkulaði lækka í verði
Verðþróun bökunarvara hefur verið mismunandi síðustu tvö ár. Sykur hefur lækkað í verði annað árið í röð og DanSukker-sykur er nú 25 prósentum ódýrari en í nóvember 2024. Euroshopper-strásykur hefur lækkað um 18 prósent á sama tímabili.
Verð á nokkrum súkkulaðivörum hefur einnig lækkað milli ára. Nóa súkkulaðiperlur, Konsum suðusúkkulaði og Nóa Síríus rjómasúkkulaðidropar hafa lækkað um 11 til 13 prósent frá nóvember í fyrra. Þrátt fyrir lækkunina eru vörurnar þó enn níu til 21 prósent dýrari en fyrir tveimur árum.
Lindu suðusúkkulaði hefur hins vegar hækkað um 30 prósent frá nóvember 2024 og Freyju suðusúkkulaðidropar um 17 prósent á tímabilinu frá 2024 til 2025. Verð á þeim síðarnefndu hefur staðið í stað síðastliðið ár.
Meðalverð á hveiti hefur lítið breyst, en egg hafa hækkað um 12 til 14 prósent frá nóvember 2024. Rjómi, smjör og mjólk hafa á sama tíma hækkað um 10 til 23 prósent.
Verðlagseftirlit ASÍ segir að lækkun á ýmsum vörum megi meðal annars rekja til sterkara gengis krónunnar og lægra heimsmarkaðsverðs á hrávörum. Kakóverð sé nú um helmingi lægra en það var í lok árs 2024.
Nóa súkkulaðiperlur 313 krónum dýrari í Krambúðinni
Mesti verðmunurinn í könnuninni var á Nóa súkkulaðiperlum. Þær kosta 476 krónur í Fjarðarkaupum en 789 krónur í Krambúðinni. Munurinn er 313 krónur, eða tæplega 66 prósent.
Kötlu púðursykur er tæplega 60 prósentum dýrari í Krambúðinni en í Prís. Þá er verð á Nesbú hamingjueggjum um 42 prósentum hærra í dýrari versluninni. Minni munur er á Kornax-hveiti, eða um 11 prósentum milli hæsta og lægsta verðs.
Engin ein verslun er með lægsta verðið á öllum vörunum sem voru skoðaðar. Prís var þó oftast ódýrast og bauð lægsta verðið á níu af þeim 16 vörum sem fengust upplýsingar um í fleiri en einni verslun. Bónus var ódýrast á fjórum vörum, Krónan á tveimur og Fjarðarkaup á einni.
Ódýrara vörumerki getur sparað hundruð króna
Verðmunurinn getur einnig verið umtalsverður þegar sambærileg vörumerki eru borin saman innan sömu verslunar.
Í Bónus er Euroshopper-hveiti til dæmis 26,4 prósentum ódýrara en Kornax-hveiti, sem jafngildir um 96 krónum. Í Krónunni sparast um 78 krónur, eða 21,4 prósent, með því að velja First Price-hveiti í stað Kornax. Í Nettó er Coop-hveiti 87 krónum ódýrara en Kornax-hveiti, eða um 23 prósent.
Svipaðan mun má sjá á bökunarsúkkulaði. Í Krónunni kostar Cachet-bökunarsúkkulaði 2.130 krónur á kílóið en Freyju suðusúkkulaði 2.995 krónur. Með því að velja ódýrari vöruna sparast 865 krónur á hvert kíló, eða um 29 prósent.
Í Prís kostar Coop-bökunarsúkkulaði 2.245 krónur á kílóið en Nóa Konsum-suðusúkkulaði 2.740 krónur. Þar er sparnaðurinn um 495 krónur á kílóið, eða 18 prósent.
Í Bónus er suðusúkkulaði undir eigin vörumerki verslunarinnar um 11 prósentum ódýrara en Freyju suðusúkkulaði miðað við kílóverð.
Verðlagseftirlit ASÍ hvetur neytendur til að bera saman verð áður en farið er í innkaup. Hægt er að nálgast verðupplýsingar á Verdlagseftirlit.is.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir