Ástandið um borð í Diamond Princess – Óvissa ríkir og farþegar að „klikkast“

Ljós­myndir og lýs­ingar far­þega af ástand­inu um borð í Diamond Princess skemmti­ferða­skip­inu vekja athygli á sam­fé­lags­miðlum. Í skip­inu eru rúm­lega 3.700 far­þegar í ein­angrun vegna kór­ónu­veirunnar sem kennd er við kín­versku borg­ina Wuhan.

Far­þeg­arnir þurfa að vera 14 daga í sótt­kví í skemmti­ferða­skip­inu við strendur Japan eftir að 20 til­felli af smiti greindust í skip­inu.

Nokkrir far­þegar Diamond Princess lýsa ástand­inu í skip­inu á sam­fé­lags­miðlum.

Farþegar mega ekki yfir­gefa her­bergi sín í þessa 14 daga. Er fram kemur í frétt Business Insider eru her­bergi skips­ins afar ólík og mis­stór, sum eru með svölum og önnur ekki. Á allra ódýr­ustu her­bergj­unum eru ekki einu sinni gluggar.

Farþegum er færður matur upp á her­bergi en mál­tíð­irnar eru ekki alltaf sér­lega lysti­legar ef marka má færslur þeirra sem hafa birt myndir af matnum á sam­fé­lags­miðlum.

Farþegar hafa þá sumir gagn­rýnt það að fyrsta mál­tíð dags­ins hefur borist mjög seint og von­laust er að fá sér­óskir upp­fylltar.

Lítið upplýsingaflæði

Einn far­þegi skips­ins, Masako Ishida, lýsti ástand­inu í sam­tali við The New York Times. Hún gagn­rýndi upp­lýs­inga­flæðið en hún heyrði fyrst af ein­angr­un­inni í fréttum en ekki frá starfs­fólki skips­ins.

Hjónin Alan og Weendy Steele höfðu sömu sögu að segja. Þau sögðu í sam­tali við The Washington Post að far­þegar þyrftu að stóla á fjöl­miðla hvað nýjar fréttir og upp­lýs­ingar varðar þar sem starfs­fólk skips­ins veita engar upp­lýs­ingar. „Það er komið fram við okkur eins og fanga og glæpa­menn,“ sögðu þau. Spurð út í líðan sína sögð­ust þau vera að „klikk­ast“.