Kaffihúsið Café Laut var byggt í tilefni af 100 ára afmæli Lystigarðsins af Akureyrarbæ. Húsið er hannað af arkitektastofunni Kollgátu. Markmiðið var að hanna hús sem myndi sóma sér vel í umhverfinu allan ársins hring sem hefur svo sannarlega tekist vel. Við hlið kaffihússins eru tvö hús og er annað þeirra í hópi elstu húsa Akureyrar. Við hönnun kaffihússins var tekið mið af þessum gömlu húsum en á sama tíma er það verðugur fulltrúi nútímaarkitektúrs. Byggingin var tilnefnd til hönnunarverðlauna Mies van der Rohe ásamt því að hljóta Menningarverðlaun DV. Upplagt er að fá sér góðan kaffibolla og njóta byggingarinnar og töfrandi umhverfisins í senn.
Krefjandi kirkjutröppur
Ef þú ert á Akureyri þá er beinlínis skylda að taka æfingu í kirkjutröppunum fyrir framan Akureyarkirkju. Sem upphitun má taka hring í bænum annað hvort gangandi eða hlaupandi og fara svo nokkrar ferðir upp og niður tröppurnar. Eftir á er svo nauðsynleg að taka rólegt niðurskokk eða labb til að koma jafnvægi á líkamann.
Minnisvarði um lífskúnstner og heimskonu
Bakgarður „tante Grethe“ er verslun sem er staðsett í Svarta húsinu við hlið Jólagarðsins í Eyjafjarðarsveit. Verslunin er tileinkuð „Tante Grethe“, lífskúnstner og heimskonu, sem fæddist í Danmörku árið 1909. Þar er að finna fallega og nytsamlega hluti fyrir heimilið í skandinavískum stíl ásamt ýmissi sælkeravöru. Bakgarðurinn er opinn alla daga í sumar frá kl. 10-18.
Frábær útivistaraðstaða
Í Kjarnaskógi rétt fyrir innan Akueyri er einnig frábær aðstaða til útivistar. Þar er hægt að ganga, hlaupa eða hjóla eftir flottum stígum og gera svo nokkrar æfingar í lokin. Ef fólk vill gera eitthvað aðeins meira krefjandi er hægt að labba á Súlur (1.213 m) suðvestan við Akureyri. Algengasta leiðin er frá öskuhaugunum en hún er um það bil 5 km og hækkunin um 880 m. Leiðin er stikuð og greiðfær en svolítið brött efst. Útsýnið frá Ytri-Súlu er frábært til norðurs og austurs og þegar færi er gott er upplagt að ganga á Syðri-Súlu þar sem útsýnið opnast til suðurs.
Athugasemdir