Hlaðvarpsþættir Jóns Sigurðar Eyjólfssonar, Rúntað á Rucio, ljúka göngu sinni í þessari viku og að því tilefni breytir hann til og horfir nú heim til Íslands í stað þess að grúska í menningu þar syðra. Nú er rótað í skáldskap Matthíasar Jóhannessen en þá rifjast upp fyrir honum löng saga sem teygir anga sína til Grikklands, Katalóníu sem og uppá ritstjórn Fréttablaðsins í Skaftahlíð. Kemur þar og margt þjóðþekkt fólk við sögu. En hvað gengur sögumanni til?
„Þó það geti vissulega gerst að einhver lesi eða heyri ljóð í fyrsta sinn og falli þar með fyrir skáldinu sem það orti þá er hitt mun algengara að skáldskapurinn falli einsog fræ um lífsleið okkar og verði síðan, hægt og bítandi, að þeim gróðri sem gefur lífinu gildi. Þannig var það til dæmis með mig og skáldskap Matthísar Jóhannessen og mig langaði til að segja þá sögu, bæði til þess að deila dálæti mínu á skáldinu en eins til þess að lýsa þessu eðli skáldskaparins sem í raun er andstæða skyndibitans. Svo sagði Matthías sjálfur á einum stað:
„…skriffinnar allsráðandi á fjölmiðlum,
en skáldin hætt að komast að
til að minna okkur á hver
við erum.“
Kannski er kominn tími til að hleypa skáldunum að á ný nú þegar við höfum ekki hugmynd hver við erum né hvert við erum fara. Allavega hefur skáldskapur Matthíasar reynst ágætis kompás fyrir mig.“
En hvað er svona flott við ljóð Matthíasar? „Að lýsa skáldskap er einsog að lýsa mat sem er náttúrlega ófullnægjandi miðað við þá reynslu að bragða á honum. Svo til að svara þessu er best að gefa ykkur smakk:
ör af kvíðboga mínum
í djúpu sári
þínu.
Svona næring finnst einungis á hlaðborði Matthíasar.“
Í lok þáttar leikur Jón Sigurður lag sem hann samdi við ljóð Matthíasar, Ferð inní janúar, en auk hans syngur Alma Jónsdóttir með honum. Einnig verður flutt lagið Zemb sem er tileinkað Sigurði Maríasi en hann kemur einmitt mikið við sögu í þættinum.
Athugasemdir