Djammið hjá Ólafi Björnssyni endaði í fangaklefa árið 1993.
Laugardagskvöld eitt árið 1993 var Ólafur Björnsson að skemmta sér ásamt tveimur vinum sínum. Því miður fyrir hann var hann látinn gista fangklefa hjá lögreglunni á Selfossi. Ólafur lýsti því í viðtali við DV árið 1993 að hann hafi verið beittur ofbeldi í fangaklefanum. Lögreglan var ósammála þessari staðhæfingu Ólafs.
„Það komu tveir hraustlegir lögreglumenn inn í klefann og réðust að mér. Ég tók á móti en þetta endaði með því að ég missti stóra hárflygsu af höfðinu, var handjárnaður og er nú óvinnufær vegna eymsla í öxlum þar sem snúið var upp á handleggina á mér. Ég hélt að menn með læti í klefunum væru látnir í friði þar sem þeir gefast vanalega upp og sofna en það á víst ekki við um mig,“ sagði Ólafur Bjömsson við DV um atvikið
Um hvernig hann endaði í fangklefanum til að byrja með sagði Ólafur:
„Við vorum að skemmta okkur á laugardagskvöldið, við höfðum drukkið. Við stoppuðum lögreglubíl og báðum lögguna að keyra okkur á skemmtistað. Löggan keyrði okkur hins vegar beint á stöðina þar sem nöfnin okkar voru tekin niður. Lögreglumennimir vissu hvar ég á heima og í einhverjum hálfkæringi nefndi ég því annað heimilisfang. Það þoldu þeir ekki og mér var stungið inn. Það var heldur snubbóttur endir á gleðinni og barði ég því hressilega á dymar og æpti dágóða stund,“ og komu lögreglumenn inn í klefa hans í framhaldinu.
„Það sýnir sig að það vantar töluvert hár efst á hvirfli sem hefur verið rifið úr. Í ljós kemur allnokkur bólga og mar aftan á öxlum,“ sagði í skýrslu læknis um ástand Ólafs eftir atvikið.
Lögreglan á Selfossi leit málið ekki alvarlegum augum og vildi meina að Ólafur gæti sjálfum sér um kennt.
„Það voru teknir þrír piltar úti á götu þar sem þeir voru búnir að loka götunni með búkkum og gangbrautarhellum. Þeir voru allir ölvaðir en einn sýnu mest, Ólafur. Sá vissi ekki einu sinni hvar hann átti heima og sneri bara út úr og brúkaði munn. Mér fannst því að hann ætti að fá að hvíla sig hjá okkur enda hafði hann staðið fyrir því aö loka götunni. Þá varð drengurinn trítilóður, lamdi og barði og greip í punginn á öðrum lögregluþjóninum sem kom í klefann. Sá bjargaði sér síðan með því að taka í hárið á honum. Það urðu þarna mikil átök sem enduðu með því að maðurinn var yfirbugaður, járnaður og bundinn. Þegar hann svo róaðist voru tekin af honum böndin, hann lagður til á dýnu og teppi breitt yfir. Það er allt í lagi þó menn skemmti sér og smakki vín en þeir verða að bera ábyrgð á því sem þeir gera,“ sagði Guðmundur Hartmannsson, varðstjóri hjá lögreglunni á Selfossi, í viðtali við DV um málið.
Athugasemdir