Sanna Magdalena Mörtudóttir segir að byrja þurfi á þörfum hinna verr settu í fyrri umræðu við fjárhagsáætlun.
Borgarfulltrúi Sósíalistaflokksins, Sanna Magdalena Mörtudóttir tók saman áherslur Sósíalistaflokksins í fyrri umræðu við fjárhagsátælun Reykjavíkurborgar. „Við verðum að byrja á þörfum hinna verr settu og byggja okkur síðan upp. Uppbygging félagslegs húsnæðis þarf að vera öflugri, það er ekki bara nauðsynlegt fyrir þau sem þurfa á húsnæði á að halda heldur lækkar slíkt útgjöld borgarinnar til lengri tíma.“ Þá segir Sanna að áætlað sé að greiðsla sérstaks húsnæðisstuðnings verði tæpur 1,7 milljarður á næsta ári. „Sé litið til síðasta árs, núverandi árs og næsta árs er áætlað að Reykjavíkurborg greiði um 4,6 milljarð í sérstakan húsnæðisstuðning.“ Bætir hún við að þó að það sé mjög mikilvægt að styðja við þau sem eru með háan húsnæðiskostnað, þá sé þetta „afleiðing þess að við erum með handónýtan húsnæðismarkað sem leiðir til þess að við erum að niðurgreiða okurleigu í stað þess að einblína á að byggja félagslegt húsnæði á viðráðanlegu verði.“
Fátækt staðreynd
„Fátækt er staðreynd hér í borginni þar sem börn fara svöng að sofa vegna matarskorts,“ segir Sanna í færslunni og bætir við: „Áætlanir okkar eiga að taka mið af því og þar geta sveitarfélögin gert margt. Sósíalistar lögðu til að skólar og frístundaheimili yrðu gerð gjaldfrjáls enda hafa börn engar tekjur og eiga ekki að greiða gjöld.“
Hægt er að sjá færsluna í heild hér fyrir neðan:
Athugasemdir